ورتالىق سايلاۋ كوميتەتىنىڭ الدىن الا بولجام بويىنشا، قاسىم-جومارت توقايەۆ 70،76 پايىز داۋىس جيناپ، ءوز ورنىندا قالۋى كەرەك. ال سايلاۋدىڭ باستى ءرولىنىڭ ءبىرىن سومداعان ءامىرجان قوسانوۆ 16،02 پايىز داۋىس جيناپ، ەكىنشى ورىنعا تابان تىرەدى.

سايلاۋ ناتيجەسىنىڭ ەڭ ءبىرىنشى بولىپ exit poll ارقىلى انىقتادى. توقايەۆ - 70،13 پايىز، قوسانوۆ - 15،39 پايىز... ءامىرجان اعامىز بۇل 13 مىڭ سايلاۋشىنىڭ اراسىنداعى ساۋالناما بولسا دا، ەڭ ءبىرىنشى بولىپ قاسىم-جومارت توقايەۆتى جەڭىسىمەن قۇتتىقتادى. 

بۇكىل الەۋمەتتىك جەلىلەر سايلاۋداعى فالسيفيكاسيا، ءبىر ادامنىڭ بىرنەشە بيۋللەتەندى جاشىككە سالىپ تۇرعان ۆيدەولارى مەن قوسانوۆ  جەڭىسكە جەتكەن سايلاۋ ۋچاسكەلەرىندەگى سۋرەتتەرگە تولىپ جاتتى.  

سايلاۋ بارىسىندا ءوز قىزمەتىن اتقارعان باقىلاۋشىلارعا كەدەرگى جاسالدى. جارىق ءسوندىرىلىپ، بولىمشەگە كىرگىزبەي قويعان كەزدە... وپپوزيسيالىق كانديدات ەڭ ءبىرىنشى بولىپ، ءوز جەڭىلىسىن مويىنداپ قويدى. ءوزىنىڭ مالىمدەمەسىندە ول نۇر-سۇلتان مەن الماتىدا وتكەن ميتينگتەرگە كوپ نازار اۋداردى. ول شاراعا شىققانداردى سىنعا الىپ، سولاردىڭ كەسىرىنەن كەرەك داۋىستارىن جيناي الماعانى ءۇشىن ولارعا كىنا تاقتى. “فرانسيادا كوفە ءىشىپ وتىرعان” ءابليازوۆتى دا سىناپ-مىنەدى. 

ءبىز قوسانوۆتان مۇنى كۇتپەدىك... ءبىز ءامىرجان اعامىزدان ءوز اۋزىنان شىققان تالاپتاردى كۇتتىك. مىسالى، "فالسيفيكاسيا جاعدايى ورىن السا، سايلاۋ ناتيجەلەرىن مويىنداماي، جۇرتتى ميتينگكە الىپ شىعادى-اۋ" دەپ ويلادى، حالىق.  

توقايەۆتى قۇتتىقتاۋمەن شەكتەلمەي، ول پوتەنسيالدى تۇردە وعان داۋىس بەرەتىن، الاڭعا شىققانداردىڭ بارىنە دە ءسوز تيگىزدى.  

ول نەگە بۇلاي ىستەدى؟ مۇمكىن بۇل سايلاۋدى سىرتىنان باسقارىپ وتىرعان جوعارى بيلىكتەگى تۇلعالارمەن جاسىرىن مامىلەگە كەلگەن بولار. ەگەر دە قوسانوۆ 6-7 پايىز جيناعاندا، ءبارى تىنىش وتەر مە ەدى؟ ءبىراق الەۋمەتتىك جەلى كومەگىمەن رەكوردتى 15 پايىز داۋىس جينادى. قازاقتان تاۋەلسىزدىگىنەن باستاپ، بىردە-بىر نازاربايەۆتىڭ قارسىلاسى مۇنداي ناتيجەگە جەتپەگەن. وسى كەزدە بيلىك "قوسانوۆ بۇكىل وپپوزيسيانى بىرىگۋگە شاقىرادى" دەپ ويلادى ما؟ بۇل كەزدە نە بولاتىنىن كىم ءبىلسىن؟!  

نە بولسا دا، قوسانوۆ ءوز قىزمەتىن اتقاردى، قوسانوۆ ەندى ساياساتتان كەتە بەرۋىڭىزگە بولادى. مارحابات! ەسىك اشىق! 

ەندى سايلاۋدىڭ وڭ جاعىن كورەيىك. بۇعان دەيىن ەشقاشان ساياسي تاقىرىپ الەۋمەتتىك جەلىلەردە ءبىرىنشى ورىنعا شىققان ەمەس. كەشە قوعام بويكوت نەمەسە قوسانوۆ دەپ بولىنسە دە، ەشكىم شەتتە قالعان جوق. بويكوت جاريالاعاندار بيلىككە كىشىگىرىم دابىل قاقتى. قوسانوۆ تا بارلىعىنا قارسى شىققان “زەلەنسكيي” بولىپ، ازاماتتىق قوعامدا  ءوز قىزمەتىن ءدال ورىندادى.  

بويكوت جاريالاعانداردىڭ ويىنشا، كىمگە داۋىس بەرسە دە، ءبارى داۋىس ساناۋ كەزىندە شەشىلەدى. ءبىراق، جەلىدە تاراعان ۆيدەولاردى قاراساق، جاشىككە سالىنىپ جاتقان "جاساندى داۋىس" بۇل جۇيەنىڭ ءالى كۇشىندە ەكەنىن كورسەتەدى. ەلدەگى كۇردەلى بيلىك ءترانزيتى كەزىندە سەنىم ارتىپ، ارتىنان قوسانوۆقا الدانىپ قالعان جۇرت پەن بويكوت جاريالاعاندار وعان ەكىجاقتى   قىسىم جاسادى دەۋگە بولادى. 

كەلەسى سايلاۋ بۇدان دا قىزىق بولايىن دەپ تۇر...