ويتكەنى سايلاۋ ۋچاسكەلەرىنىڭ كوبى ءبىلىم مەكەمەلەرىندە ورنالاسقان. سونىمەن قاتار الەۋمەتتىك جەلىلەردە مۇعالىمدەردىڭ باقىلاۋىندا زاڭ بۇزۋشىلىق فاكتىلەرى بار ۆيدەولار تاراعان دەپ جازادى Qamshy.kz اقپارات اگەنتتىگى. 

مارتەبەسى جوعارى، ابىرويى اسقاق ۇستازدىڭ بۇگىنگى قوعامداعى بەدەلى تومەن. اتا-انا، وقۋشى ءتىپتى باسشىلىق ۇستازداردىڭ ەڭبەگىن باعالاماۋعا اينالعان. سايلاۋ ناۋقانى بولادى دەگەن كۇننەن باستاپ، ۇستازدار كوشە-كوشەنى ارالاپ كەتەتىنى جاسىرىن ەمەس.

9 ماۋسىمدا وتكەن ق ر پرەزيدەنتىنىڭ كەزەكتەن تىس سايلاۋىنا قاتىستى جۇمىستارعا مۇعالىمدەردى كۇشتەپ تارتىپ جاتىر دەگەن مالىمەتكە قاتىستى ءبىلىم جانە عىلىم ءمينيسترى كۇلاش ءشامشيدينوۆا ۇكىمەت كۋلۋارىندا بۇعان دەيىن پىكىر بىلدىرگەن ەدى. قۇزىرەتتى ورگاندار ەلىمىزدىڭ سايلاۋ زاڭناماسىنا سايكەس جۇمىسىن ىستەيتىنىن ەسكەرسەك، «قازاقستان رەسپۋبليكاسىنىڭ سايلاۋ تۋرالى زاڭناماسىنا سايكەس، سايلاۋ كوميسسياسى ەل تۇرعىندارىن تارتۋعا قۇقىلى. سوندىقتان مۇنىڭ بارلىعى زاڭ اياسىندا بولادى»، - دەپ قىسقا قايىرعان بولاتىن.

كوشە كەزىپ ارالاپ، اركىمنىڭ ەسىگىن ءبىر قاعىپ، «سايلاۋعا كەلىڭىزشى»، - دەپ جالىنىپ جۇرگەن ۇستازدى كىم سىيلاسىن؟! ۇستازداردى بيلىكتىڭ قول بالا قىلعانى جانىڭا باتادى. ءتىپتى سول سايلاۋ ناۋقانى كەزىندە جۇرگىزگەن جۇمىستارى ءۇشىن ءبىر تيىن اقشا دا المايدى، تەك ىستەپ جۇرگەن جۇمىسىنان ايىرىلىپ قالماۋدىڭ امالىنان ءماجبۇرلى تۇردە اتقارىلادى. ويتكەنى مەكتەپ باسشىلىعى ءار ۇستازعا وسىنداي تالاپ قويادى. سايلاۋ ناۋقانىنا ارالاسقان بارلىق ازاماتتارعا ارنايى اقشا تولەنۋگە ءتيىس. ويتكەنى، بيىلعى كەزەكتەن تىس سايلاۋعا مەملەكەتتىك بيۋدجەتتەن 9 ملرد 348 ملن تەڭگە ءبولىندى، ونىڭ 70 پايىزى ەڭبەكاقى ءۇشىن قاراستىرىلعان.

ەلوردا اكىمدىگى بيىلعى پرەزيدەنت سايلاۋىنا مەكتەپ مۇعالىمدەرىنىڭ ارالاسپايتىنى جايلى مالىمدەمە جاساعان بولاتىن. بۇل تەك نۇر-سۇلتان قالاسىنىڭ مۇعالىمدەرىنە عانا قاتىستى ارتىقشىلىق بولاتىن.

ءبىز سايلاۋ كوميسسياسىنىڭ قۇرامىنا كىرۋگە ەشكىمدى ماجبۇرلەگەن جوقپىز. سايلاۋ كوميسسياسى ءتيىستى ءتارتىپ بويىنشا ءار بەس جىل سايىن جاڭارتىلىپ وتىرادى. قازىرگى كوميسسيانىڭ ىشىندە ءار ءتۇرلى ساناتتاعى ادام بار. مۇعالىمدەر دە، باسقا دا مەكەمە ۇيىمداردىڭ قىزمەتكەرلەرى كىرگەن"، - دەدى قالا اكىمى اپپاراتى باسشىسىنىڭ ورىنباسارى ازامات احمەدجانوۆ.

ءوزىنىڭ ەسىمىن جاريالاماۋدى وتىنگەن نازىم (اتى وزگەرتىلگەن) ەسىمدى ءمۇعالىم: «امال جوق، كوشەلەردى ارالاپ ءتىزىم جاساۋعا ءماجبۇرمىز. ارالاپ ءجۇرىپ، ەلدەن ءسوز ەستيتىنىمىز تاعى بار. بۇنىڭ بىزگە قانشالىقتى قاجەتى بار، نەگە قايتا-قايتا كەلىپ تىركەيسىڭدەر دەپ ۇرسا جونەلەدى. اركىمنىڭ ەسىگىن قاققان وڭاي ەمەس. كۇندىز شاكىرتتەرىڭە ءبىلىم بەرۋىمىز كەرەك، تۇنىمەن وتىرىپ سايلاۋعا شاقىرۋ قاعازدارىن جازدىق. سونىمەن قاتار كۇندەلىك.كز ەلەكتروندى جۋرنالدى دا تولتىرىپ وتىرۋىمىز كەرەك. مۇعالىمدەردىڭ بارلىعى كىرىپ ەلەكتروندى جۋرنال تولتىراتىندىقتان، جۇيەگە كىرۋ وتە قيىن. ءتىپتى كەيدە ينتەرنەت دۇرىس ىستەمەي جاتادى. ءبىزدىڭ دە بالا-شاعامىز، وتباسىمىز بار. ولارعا كوڭىل ءبولۋدى مۇلدەم ۇمىتتىق»، - دەيدى.

الايدا سايلاۋ ۋچاسكەلەرىندە بولعان زاڭسىزدىقتاردى ايعاقتايىن الەۋمەتتىك جەلىدە تاراعان ۆيدەولاردان ۇستازداردىڭ ۇلكەن قىلمىس جاساعانىن كورۋگە بولادى. مۇعالىمدەر سايلاۋعا كەلمەگەندەردىڭ اتىنان بيۋللەتەندەردى تولتىرىپ، سايلاۋ جاشىگىنە كەزەك-كەزەك سالىپ جاتىر. "نەگە ولاي ەتەسىزدەر؟" دەگەن ساۋالعا جاۋاپ بەرە المايدى. تەك كوزدەرىنەن "ءماجبۇرمىز" دەگەن ويدى وقۋعا بولادى. وسىنى كورگەن جەلى قولدانۋشىلارى «الداعى ۋاقىتتا ۇستازداردى قالاي سىيلايمىز؟»، «قازىرگى ۇستازداردىڭ نە سەبەپتى سىيسىز ەكەنىن ەندى تۇسىندىك» دەپ رەنىشتەرىن بىلدىرۋدە.

الەۋمەتتىك جەلىگە تاراعان ۆيدەوعا قاتىستى پىكىر بىلدىرگەن مەكتەپ ديرەكتورلارى "بۇل اراڭداتۋشىلىق" دەيدى. ياعني، ەشقانداي مەكتەپتەردە زاڭ بۇزۋشىلىق بولىپ جاتقان جوق.

ۇستازداردىڭ ءدال وسىنداي جاعدايعا دەيىن تومەندەۋىنە نە سەبەپ؟ وسى جاعدايعا قانداي دا ءبىر تۇسىنىك بەرۋگە بارلىعى قورقادى. ەشكىم قالىپتاسقان جۇيەگە قارسى شىققىسى كەلمەيدى. بارلىعى ءماجبۇرلى تۇردە بولىپ جاتىر. ءتىپتى ءار ءمۇعالىم 10 ادامنىڭ اتىنان داۋىس بەرگەن. سايلاۋداعى ادىلەتسىزدىك ءۇشىن مۇعالىمدەر جاۋاپتى ما؟ الدە ۇلاعاتتى ۇستازدار ايداعاننىڭ جەتەگىنە ەرىپ، تاپسىرمانى ءمىنسىز ورىنداي بەرۋى كەرەك پە؟

پىكىر سۇراعانىمىزدا جاۋاپ بەرۋدەن جالتارعان ۇستازداردى دا تۇسىنۋىمىزگە بولادى. ويتكەنى ءبارىنىڭ باسى ەكەۋ ەمەس. ءارقايسىسىنىڭ ارتىندا اسىرايتىن بالاسى، ءۇمىت ارتىپ وتىرعان تۋىسى بار.  ەسكى جۇيەنى وزگەرتۋگە دارمەنسىزدىك تانىتقان قۇلدىق سانادان ارىلاتىن كۇن دە تۋار. ءبىراق، ءبىز نە سەبەپتى ۇستاز دەگەن ۇلى ەسىمنىڭ اسقاق رۋحىن ءتۇسىرىپ جىبەردىك؟ بيلىك باسىنداعى بيىك مانساپتى شەنەۋنىك تە، قاراپايىم حالىق تا سول ۇستازدىڭ ارقاسىندا ءبىلىم الىپ، ءارىپ تانىدى ەمەس پە!؟ بيلىكتەگىلەر ءمۇعالىمنىڭ مارتەبەسىن كوتەرسە، ۇستازدار دا ءوز كەزەگىندە زاڭسىز ارەكەتتەرگە بارۋدان باس تارتسا مۇنداي جاعداي بولماس ەدى عوي دەگەن وي تۋىندايدى.