كارىم ءماسىموۆ ۇلتتىق قاۋىپسىزدىك كوميتەتىنىڭ ءتوراعاسى بولىپ تاعايىندالدى دەپ حابارلايدى Qamshy.kz اقپارات اگەنتتىگى اقوردانىڭ رەسمي سايتىنا سىلتەمە جاساپ.

"كارىم قاجىمقان ۇلى ءماسىموۆ قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ ءتوراعاسى بولىپ تاعايىندالسىن"، - دەلىنگەن قۇجاتتا.

كارىم ءماسىموۆ — 1965 جىلى 15 ماۋسىمدا قازاقستاننىڭ سەلينوگراد قالاسىندا (قازىرگى نۇر-سۇلتان) دۇنيەگە كەلگەن. 1982 جىلى الماتى قالاسىنداعى رەسپۋبليكالىق فيزيكا-ماتەماتيكا مەكتەبىن ۇزدىك بىتىرگەن. 1985 جىلى ماسكەۋ قالاسىنداعى پاتريس لۋمۋمبا اتىنداعى حالىقتار دوستىعى ۋنيۆەرسيتەتىندە اراب فيلولوگياسى بويىنشا ءبىلىم الدى. 1988 جىلى بەيجىڭدەگى ءتىل ءبىلىمى ينستيتۋتىندا وقىعان. 1991 جىلى قىتايداعى ۋحان زاڭ ۋنيۆەرسيتەتىن، 1995 جىلى قازاق مەملەكەتتىك باسقارۋ اكادەمياسىن بىتىرگەن.

ماماندىعى – قارجىگەر، زاڭگەر، قىتايتانۋشى، ەكونوميكا عىلىمدارىنىڭ دوكتورى. ورىس، قازاق، اعىلشىن، جۇڭگو، اراب تىلدەرىن مەڭگەرگەن؛

ءار جىلدارى كولىك جانە كوممۋنيكاسيا ءمينيسترى، پرەمەر-مينيسترىنىڭ ورىنباسارى، قازاقستان پرەزيدەنتىنىڭ كومەكشىسى، پرەمەر-مينيستر قىزمەتتەرىن اتقاردى.

2012 جىلدىڭ  قىركۇيەگىندە كارىم ءماسىموۆ ۇكىمەت باسشىسى قىزمەتىنەن كەتۋگە ارىز بەردى. پرەزيدەنت نۇرسۇلتان نازاربايەۆ ءوتىنىشتى قابىلدادى. سول كۇنى پرەزيدەنت اكىمشىلىگىنىڭ باسشىسى بولىپ تاعايىندالدى.

2014-2016 جىلدارى ەكىنشى رەت قازاقستان پرەمەر-مينيسترى قىزمەتىن اتقاردى. 2016 جىلدىڭ 8 قىركۇيەگىنەن قازاقستان ۇلتتىق قاۋىپسىزدىك كوميتەتىنىڭ باسشىسى بولىپ تاعايىندالدى.