بەلگىلى اقىن، "ايتىس اقىندارى مەن جىرشى-تەرمەشىلەردىڭ حالىقارالىق وداعى" رەسپۋبليكالىق قوعامدىق بىرلەستىگىنىڭ ءتورعاسى ءجۇرسىن ەرمان  Qamshy.kz اقپارات اگەنتتىگىنىڭ تىلشىسىنە ايتىسكەر اقىن رينات زايتوۆتىڭ ءقازىر قاي جاقتا جۇرگەنىنەن حابارسىز ەكەنىن ايتتى.

ءجۇرسىن ەرماننىڭ ايتۋىنشا، رينات زايتوۆتى ءوزى دە تاپپاي وتىر.

"ريناتتىڭ قايدا ەكەنىن وزىمدە بىلمەيمىن. حابارلاسا الماي جاتىرمىز. ءوزىنىڭ تۋعان جەرى اياگوزگە كەتىپ قالدى عوي دەيمىن. ناقتىسىن بىلمەيمىن. 16 ماۋسىمدا تارباعاتايدا وتەتىن ايتىسقا قاتىسۋ كەرەك بولعان. ءبىراق سوڭعى بولعان جاعدايلارعا بايلانىستى تىزىمنەن سىزىلدى. ايتىستى ۇيىمداستىرۋشىلار "ريناتتى الىپ كەلمە" دەپ وتىر"، - دەدى ءجۇرسىن ەرمان.

ايتىسكەر اقىن رينات زايتوۆ 10 ماۋسىمدا كەزەكتەن تىس پرەزيدەنت سايلاۋىنىڭ ناتيجەسىمەن كەلىسپەيتىنىن ايتىپ ءبىر توپ باقىلاۋشىلارمەن بىرگە الماتىداعى "الاتاۋ" ءداستۇرلى ونەر تەاترىنىڭ الدىنا جينالعان. ول حالىقتان سايلاۋدا "ءامىرجان قوسانوۆتى قولدايىق" دەپ ايتقانى ءۇشىن كەشىرىم سۇراپ، الداعى ۋاقىتتا پارتيا قۇرعىسى كەلەتىنىن ايتا باستاعاندا پوليسيا مەن ارنايى جاساق جينالعانداردى جاپپاي ۇستادى. ۇستالعانداردىڭ اراسىندا زايتوۆتا بولدى.

ءبىراق ءبىرشاما ۋاقىتتان كەيىن اقىن Youtube جەلىسىندەگى ارناسى ارقىلى ءوزىن پوليسيا بوساتقانىن ايتىپ ۆيدەو تاراتتى.

500-گە جۋىق ادام زايتوۆتى "ءوز كوزىمىزبەن كورمەسەك، بوساتىلعانىنا سەنبەيمىز" دەپ الماتى پوليسيا دەپارتامەنتىنىڭ الدىنا جينالدى. رينات زايتوۆ جينالعانداردىڭ اراسىنا ءوزى كەلىپ، تارقاۋعا شاقىردى.

10 ماۋسىمنان بەرى رينات زايتوۆتى ىزدەگەن حالىق كوپ. زايتوۆتىڭ ءوزى ءبىراق ءالى ءۇنسىز. Youtube ارناسىنداعى بارلىق ۆيدەوسىن وشىرگەن. 

♦وقي وتىرىڭىزدار: رينات زايتوۆ: ءبارى جاقسى، الاڭداماڭىزدار!