«اتىراۋ» فۋتبول كلۋبى قازاقستان كۋبوگىنىڭ جارتىلاي فينالىنداعى ويىندا «ورداباسى» كومانداسىمەن تەڭ ءتۇستى.
اتىراۋداعى كەزدەسۋ 0: 0 ەسەبىمەن اياقتالدى. شىمكەنتتەگى العاشقى ويىن 1: 1 ەسەبىمەن اياقتالعان بولاتىن. سول سەبەپتى، جالپى ەسەپتە اتىراۋلىق كوماندا سىرت الاڭدا سوعىلعان گولعا بايلانىستى فينالعا جولداما الدى.
- بۇگىن فۋتبولشىلار جاقسى ويىن ورنەگىن كورسەتتى. وڭىرىمىزدەگى فۋتبول قارقىندى دامىپ كەلە جاتىر. كوماندامىزدىڭ فينالعا جولداما العاندىعى جانكۇيەرلەردى قۋانتادى جانە كورەرمەندەردىڭ قىزىعۋشىلىعىن ارتتىرۋعا سەپتىگىن تيگىزەدى دەپ سەنەمىز. «مۇنايشى» ستاديونىن قايتا جاڭارتۋ جۇمىستارىنا ات سالىسقان بارلىق دەمەۋشىلەرگە العىسىمىزدى ايتامىز. سولاردىڭ ارقاسىندا اتىراۋعا ۇلكەن فۋلبول كەلدى. الداعى ۋاقىتتا تەك جەڭىس تۇعىرىنان كورىنۋلەرىڭىزدى تىلەيمىن، - دەدى وبلىس اكىمى نۇرلان نوعايەۆ.
ايتا كەتەيىك، كەزدەسۋ جاڭارتىلعان «مۇنايشى» فۋتبول الاڭىندا ءوتتى. «مۇنايشى» فۋتبول ستاديونىنىڭ بۇرىنعى « ءتىرى ءشوپ» گازوندارى پايداعا اسپاۋىنا بايلانىستى، «GAZ stroy montazh KZ» ج ش س –ءنىڭ دەمەۋشىلىگىمەن جاساندى الاڭ سالىنعان بولاتىن. جاڭا الاڭ فيفا – نىڭ بارلىق تالاپتارىنا سايكەس كەلەدى. سىيىمدىلىعى – 8 690 ادام. گازونى جاڭارتىلعاننان كەيىن، ستاديوننىڭ اۋماعى 110 دا 70 مەتردى قۇرايدى.