23 ماۋسىم كۇنى قازاقستاندىق پوليسەيلەر ءوز كاسىبي مەرەكەلەرىن اتاپ وتەدى. اتىراۋ وبلىسىنىڭ اكىمى مەن پوليسيا دەپارتامەنتىنىڭ باسشىسى وبلىسىمىزدىڭ پوليسەيلەرىن مەرەكەلەرىمەن قۇتتىقتادى.
2007 جىلى مەملەكەت باسشىسىنىڭ جارلىعىمەن 23 ماۋسىم كۇنى پوليسيا كۇنى دەپ رەسمي تۇردە بەكىتىلدى.
وبلىس اكىمى نۇرلان نوعايەۆ پوليسيا دەپارتامەنتىنىڭ قىزمەتكەرلەرىن مەرەكەمەن قۇتتىقتاپ، اتقارىپ جاتىرعان جۇمىستارىنا ريزاشىلىعىن ءبىلدىردى. پوليسيا سالاسىندا قىزمەت ەتۋ وتە ءقاۋىپتى جانە قيىن. ءبىراق بارلىق اۋىرتپالىقتارعا قاراماستان، ءتارتىپ ساقشىلارى قوعامداعى زاڭدىلىقتى ساقتاۋ ءۇشىن قىزمەت ەتۋدە.
-قوعامدىق ءتارتىپ پەن ازاماتتاردىڭ قاۋىپسىزدىگىن قامتاماسىز ەتۋ ءۇشىن سىزدەرگە ۇلكەن جاۋاپكەرشىلىك جۇكتەلەدى. سىزدەردى ادال قىزمەتتەرىڭىز بەن تاڭداعان ماماندىعىڭىزعا ادالدىق تانىتقاندارىڭىز ءۇشىن شىن جۇرەكتەن العىسىمدى بىلدىرەمىن.
ىشكى ىستەر ورگاندارىندا ەڭبەك ەتكەن ارداگەرلەرگە العىس ايتامىز. ارداگەرلەر بۇگىن دە ءىزباسارلارى - جاس ۇرپاققا ۇلگى بولا الادى. بۇل كىسىلەر ءوز ىستەرىن جوعارى دەڭگەيدە اتقارعان ناعىز ماماندار،- دەدى نۇرلان نوعايەۆ.
وبلىس باسشىسى پوليسيانىڭ الەۋەتى وتە جوعارى ەكەندىگىن، وبلىستىق بيلىكتىڭ كومەگىمەن ماتەريالدىق-تەحنيكالىق بازانىڭ دەڭگەيى ەداۋىر كوتەرىلگەنىن اتاپ ءوتتى. قۇقىق قورعاۋ ورگانداردىڭ قىزمەتكەرلەرىن تۇرعىن ۇيمەن قامتاماسىز ەتۋ ماسەلەلەرى دە شەشىلۋدە.
- قوعام مەن مەملەكەتتىڭ مۇددەسىن قورعاۋ ءبىزدىڭ قۇقىق قورعاۋ ورگاندارىنىڭ مىندەتتەرىنىڭ ءبىرى. مەملەكەت وسى مىندەتتەردى جۇزەگە اسىرۋ ءۇشىن بارلىق جاعدايلاردى جاساۋدا. جول قاۋىپسىزدىگىن ساقتاۋ ءۇشىن، قاداعالاۋ كامەرالارىن ورناتۋعا جەتكىلىكتى تۇردە قاراجاتتار بولىنۋدە. زاڭسىز بالىق ونىمدەرىن ساتۋمەن اينالاساتىندارمەن كۇرەس جۇرگىزىلدى. الداعى ۋاقىتتا دا ءبىزدىڭ پوليسيامىزدىڭ ابىرويى جوعارى دەڭگەيدە بولاتىنىنا سەنىمدىمىن. كەيدە مىندەتىن اتقارۋ ءۇشىن پوليسيا قىزمەتكەرلەرى باسىن قاتەرگە تىگەدى. ءوز ءومىرى مەن دەنساۋلىعىنا ءقاۋىپ تونسەدە، پوليسيا حالىقتىڭ دەنساۋلىعى مەن ءومىرىنىڭ تىنىشتىعى ءۇشىن جۇمىس جاسايدى. ءبىزدىڭ وبلىسىمىزدا بۇعان دالەلدەر كوپ،- دەدى نۇرلان نوعايەۆ.
وبلىستىق پوليسيا دەپارتامەنتىنىڭ باسشىسى حامزا ۇمبەتقالييەۆ ارىپتەستەرى مەن قىزمەتكەرلەردى مەرەكەمەن قۇتتىقتاي وتىرىپ، پوليسيا قىزمەتكەرلەرىنىڭ ءوز مىندەتتەرىن الداعى ۋاقىتتا دا ابىرويمەن اتقارا بەرەتىنىنە سەنىم ءبىلدىردى.
مەرەكەگە وراي، قازاقستان رەسپۋبليكاسى ىشكى ىستەر ءمينيسترىنىڭ بۇيرىعىمەن پوليسيا قىزمەتكەرلەرىنە اسكەري شەندەر بەرىلدى. ءبىرقاتار قىزمەتكەرلەر ادال قىزمەتى ءۇشىن ماقتاۋ قاعازدارىمەن جانە العىس حاتتارمەن ماراپاتتالدى.