ارىستاعى جارىلىس كەزىندە اتا-اناسىنا سالەم جولداپ، قوشتاسقان ساربازدىڭ ۆيدەوسى الەۋمەتتىك جەلىدە قىزۋ تالقىعا تۇسكەن بولاتىن دەپ جازادى Qamshy.kz اقپارات اگەنتتىگى. ول كەيىن قاشىپ كەتكەن ساربازدار مەن كومانديرلەردى دە سىنعا الىپ ۆيدەو جاريالادى. جارىلىس كەزىندە ءولىپ كەتسەم، اتا-اناممەن قوشتاسا الماي قالامىن با دەپ قورىققان ساربازدىڭ كىم ەكەنى بەلگىلى بولدى. 

يساتاي الىبايەۆ 27 جاستا، الماتىنىڭ تۋماسى. ۇيلەنگەن 4 اي بۇرىن اكە اتانىپتى. اسكەرگە 2011 جىلى شاقىرىلىپ، سودان بەرى لەيتەنانت شەنىنە دەيىن كوتەرىلگەن. 

ول باستاپقىدا نە بولىپ جاتقانىن تۇسىنە الماعان. باستاپقىدا بومبالاۋ باستالدى دەپ ويلاعان. 

"وقيعا شامامەن 9:15-9:20 ارالىعىندا بولدى. سناريادتار ۇشىپ، جارىلىپ جاتتى. ءبىزدى بومبالاپ جاتقانداي بولدى. قايدا جاسىرىنساڭ دا ەش پايداسى بولمادى. بارلىعى بىردەي قيراپ، قۇلاپ جاتتى. ارەڭ قۇتىلدىق. ءبىزدىڭ امان قالۋىمىز ەكىتالاي ەدى. عاجايىپ بولدى!"، - دەيدى يساتاي الىبايەۆ. 

لەيتەنانت 2-3 مەتر جەردە سناريادتاردىڭ جارىلىپ جاتقانىن كورگەن كەزدە ولەمىن دەپ ويلاعان. مۇنى ول جاسىرمادى دا. اقىرعى تىلەگى اتا-اناسىن قالاي جاقسى كورەتىنىن ايتىپ قالۋ بولىپتى. وسىلاي لەيتەنانت الەۋمەتتىك جەلىدە قىزۋ تالقىلانعان ۆيدەونى تۇسىرگەن.

"كوز الدىڭىزعا ەلەستەتىڭىزشى. كەز كەلگەن مينۋتتا، ءتىپتى سەكۋندتا ءولىپ كەتۋىم مۇمكىن ەدى. ولەر الدىندا اتا-انامدى قاتتى جاقسى كورەتىنىمدى ايتىپ، قوشتاسۋدى ءجون كوردىم. سولاي ىستەتىم دە. كەيىن ءوز-وزىمدى قولعا الدىم. بەرگەن انتىم مەن كيگەن فورمامدى ويلاپ، سابىرعا كەلدىم. ۋادەمدە تۇرۋىم كەرەك، نە بولسا دا تۇرعىنداردى قۇتقارۋعا تىرىستىم. ءوزىم ءولىپ كەتسەم دە، قولىمنان كەلگەنشە قاراپايىم حالىقتى قۇتقارۋىم كەرەك دەپ ويلادىم. وز-وزىمە كەلگەن سوڭ ىسكە كىرىستىم. تۇرعىنداردى ەۆاكۋاسيالاۋعا كومەكتەستىم. باسقا دا بىرنەشە ۆيدەو ءتۇسىردىم. بىرنەشە جول اپاتى بولدى. دۇربەلەڭ مەن ادامداردىڭ قورقىنىشى جول اپاتىنا اكەلىپ سوقتى. ايعايلاپ، بەيادەپ سوزدەردى ايتۋعا تۋرا كەلدى. كولىكتەردى توقتاتىپ، تۇرعىنداردى الىپ كەتسىن دەدىم. كەيىن قالىپ قويعان ادامداردى ىزدەستىرە باستادىم. كەز كەلگەن ادامدا قورقىنىش بولادى. ءبىراق ءار ادام سول قورقىنىشىن جەڭە بىلگەنى دۇرىس. مەنىڭ انام 1967 جىلى، ال اكەم 1966 جىلى دۇنيەگە كەلگەن. انام اۋرۋحانادا جۇمىس ىستەيدى. ال اكەم كاسىپكەر. "، - دەدى لەيتەنانت.