ارىستاعى بەينەجازبا ارقىلى تانىمال بولعان  27 جاستاعى يساتاي الىبايەۆ اتا-اناسىنا جولداعان بەينەجازبادان سوڭ بەلگىسىز كاسىپكەر قوماقتى قارجى بەرگەنىن ايتادى دەپ جازادى Qamshy.kz اقپارات اگەنتتىگى.

ول بۇل اقشانى ارىستىق تۇرعىندارعا بەرمەكشى

ساربازدىڭ ايتۋىنشا، ول كاسىپكەردى كوشەدە كەزدەستىرگەن. تۇرعىنداردى ەۆاكۋاسيالاۋعا كومەكتەسكەنى ءۇشىن العىس ءبىلدىرىپ، قولىنا ءبىر بۋما ون مىڭدىقتاردى ۇستاتقان. الايدا يساتاي الىبايەۆ كۇتپەگەن سىيلىقتان باس تارتقانىمەن، كاسىپكەر ونىڭ ىسىمەن ماقتان تۇتاتىنىن ايتىپ، قالتاسىنا سالىپتى.

"بۇل وتە قوماقتى قارجى، سانامادىم، ءبىراق 100 مىڭ تەڭگەنىڭ اينالاسىندا. ءتىپتى، ودان دا كوپ بولۋى مۇمكىن. مەن بۇل اقشانى العىم كەلمەدى. ءبىراق ول ايتقانىنان قايتپادى: "سەن جارادىڭ. مەن سەنى ماقتان تۇتامىن!" - دەدى دە، قولىمدى الىپ، قۇشاقتادى.

"مەن تەك ءوز اسكەري مىندەتىمدى ورىندادىم. مەنىڭ ورنىمدا كەز-كەلگەن ادام وسىلاي جاساپ ەدى. بۇل اقشانى ارىس قالاسىنىڭ تۇرعىندارىنا بەرەمىن. ولاردىڭ كوبىسىنىڭ ۇيلەرى تۇگەلدەي قيراپ قالعان.

سونداي-اق، بارشا قازاقستاندىقتاردى ارىس جۇرتىنا قاراجات جيناۋعا شاقىرامىن.كىم قانشا بەرە الادى، مەيلى 50، 100، 200 تەڭگە بولسىن جانە ازىق-تۇلىك، كيىم-كەشەكپەن بولسىن. ولارعا ءاربىر كومەگىمىز قاجەت"، - دەيدى يساتاي الىبايەۆ.

بۇعان دەيىن اتىشۋلى بەينە كەيىپكەرى تج كەزىندە  نەگە بەينەجازبا تۇسىرگەنىن ايتتى. ول بىرنەشە مەتر قاشىقتىقتا سناريادتار جارىلا باستاعان كەزدە "ولەمىز" دەپ ويلاپ، سوڭعى جانە جالعىز تىلەگى اتا-اناسىن قالاي جاقسى كورەتىنىن ايتۋ بولعان. ءبىراق سودان كەيىن  ءوز-وزىن قولعا الىپ، وقيعا ماڭىندا قالعان ازاماتتىق ادامداردى قۇتقارۋدى جالعاستىردى.

ەستەرىڭىزگە سالا كەتەيىك، 24-ماۋسىمدا تۇركىستان وبلىسىنىڭ ارىس قالاسىندا توتەنشە جاعداي ورىن العان بولاتىن. تۇرعىندار ءوز ۇيلەرىن تاستاپ قاشقان. قازىرگى ۋاقىتتا قالا بوس تۇر.

ارىس تۇرعىندارى ءۇشىن گۋمانيتارلىق كومەك جيناۋدى الماتىدا قوعامدىق قوزعالىستاردىڭ بەلسەندىلەرى باستاعان بولاتىن. سونداي-اق، Nur Otan كومەك جيناۋ مەكەن-جايىن جاريالادى. قاراعاندى وبلىسىنىڭ پارتيا مۇشەلەرى ءبىرىنشى بولىپ ءۇن قوستى. كەشە ارىس قالاسىنا ازىق-تۇلىك ونىمدەرى، كيىم-كەشەك، جەكە باس گيگيەناسى زاتتارى جانە العاشقى قاجەتتىلىك زاتتارى بار 10 توننا گۋمانيتارلىق جۇك جونەلتىلدى.

Twitter-دە قازاقستان پرەزيدەنتى قاسىم-جومارت توقايەۆ ارىس تۇرعىندارىنا كومەك كورسەتكەنى ءۇشىن قازاقستاندىقتارعا العىسىن ءبىلدىردى. مەملەكەت باسشىسى بارلىق ەرىكتىلەرگە العىسىن ءبىلدىرىپ، ارىس قالاسىن قالپىنا كەلتىرەتىنىن، ال مەملەكەت تۇرعىندارعا كومەكتەسەتىنىن اتاپ ءوتتى.

اۋدارعان: اقجىبەك ارالبەك