قاراعاندى-تەمىرتاۋ تاسجولىنداعى "قازمۇنايگاز" جانار-جاعارماي قۇيۋ بەكەتىنىڭ جانىندا ءىرى اپات بولدى دەپ حابارلايدى Qamshy.kz اقپارات اگەنتتىگى sputniknews.kz سايتىنا سىلتەمە جاساپ.

التى ادام وقيعا ورنىندا كوز جۇمدى. ءۇش ادام ءتۇرلى جاراقاتپەن اۋرۋحاناعا جەتكىزىلدى.

دەنساۋلىق ساقتاۋ باسقارماسىنىڭ باسپا ءسوز قىزمەتىنىڭ حابارلاۋىنشا، وبلىستىق تراۆماتولوگيا ورتالىعىنا ءۇش ادام جەتكىزىلگەن.

"ءبىر ايەل باس جاراقاتىن العان، بۇعاناسى سىندى. ەكىنشى ناۋقاس تا باس جاراقاتىن العان. ءۇشىنشى ايەلدە اياقتىڭ جابىق سىنىعى بار، باسىن جاراقاتتاعان. ءقازىر زارداپ شەككەندەرگە ءتيىستى مەديسينالىق كومەك كورسەتىلۋدە"، - دەپ حابارلادى باسقارمانىڭ باسپا ءسوز حاتشىسى.

تراۆموتولوگيالىق قىزمەت ورتالىعى حيرۋرگتار مەن نەيروحيرۋرگتاردىڭ قوسىمشا بريگادالارىن جاساقتادى.

دارىگەرلەردىڭ ايتۋىنشا، قازا تاپقانداردىڭ اراسىندا بالالار جوق.

قاراعاندى وبلىسى پوليسيا دەپارتامەنتى باسپا ءسوز قىزمەتىنىڭ مالىمەتىنە سايكەس، Daewoo كولىگىنىڭ جۇرگىزۋشىسى كىنالى بولۋى مۇمكىن. الدىن الا اقپارات بويىنشا قاراعاندىعا بەت العان 30 جاستاعى ايەل رولگە يە بولا الماي قالىپ، قارسى باعىتقا شىعىپ كەتكەن. ونىڭ كولىگى Audi-مەن سوقتىعىسادى. رولدە 36 جاستاعى ەر ادام بولدى.

"جول اپاتى سالدارىنان ەكى جۇرگىزۋشى مەن كولىكتەردەگى ءتورت جولاۋشى وقيعا ورنىندا قازا تاپتى"، - دەپ حابارلادى باسپا ءسوز قىزمەتى.

اپاتقا قاتىستى ق ر قىلمىستىق كودەكسىنىڭ 345-بابى 4-بولىگى بويىنشا سوتقا دەيىنگى تەرگەۋ باستالدى.