نۇرلان نوعايەۆ يوردانيا، پالەستينا جانە ليۆان ەلشىلەرىمەن كەزدەستى

/image/2019/07/02/crop--3_78_725x1288_whatsapp-image-2019-07-01-at-16.34.32-2.jpeg

بۇگىن، 1 شىلدە كۇنى اتىراۋ وبلىسىنىڭ اكىمى يوردانيانىڭ قازاقستانداعى ەلشىسى يۋسۋف ابدۋلگانيمەن، ليۆان ەلشىسى جيسكار ال-حۋريمەن جانە پالەستينا ەلشىسى مونتاسەر ابۋ زەيدپەن كەزدەستى. تاراپتار تەڭىز ۆاحتالىق قالاشىعىندا بولعان وقيعانى تالقىلادى دەپ حابارلايدى Qamshy.kz اقپارات اگەنتتىگى اتىراۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.

اتىراۋ وبلىسىنىڭ اكىمى ءقازىر تەڭىز قالاشىعىندا احۋال تۇراقتى ەكەنىن، 30-دان استام ادام جەڭىل جاراقات العانىن، ومىرلەرىنە ءقاۋىپ جوق ەكەنىن ايتتى.

اتىراۋ

"اتىراۋ وبلىسى اكىمىنىڭ ءبىرىنشى ورىنباسارى جەتەكشىلىك ەتەتىن ۆەدومستۆوارالىق كوميسسيا قۇرىلدى، كوميسسيا وقيعانىڭ سەبەپ-سالدارىن انىقتايتىن بولادى. ءبىزدىڭ تاراپىمىزدان وسىنداي وقيعالاردى الداعى ۋاقىتتا بولدىرماۋ ماقساتىندا بارلىق شارالار قولعا الىنادى. تەڭىز جوباسىنا تارتىلعان جۇمىسشىلاردىڭ ومىرلەرى مەن دەنساۋلىقتارىنا ءقاۋىپ جوق، بۇل ماسەلە ءبىزدىڭ نازارىمىزدا"،- دەدى نۇرلان نوعايەۆ.

ەلشىلەر وقيعانىڭ تۇرمىستىق سيپاتتا ەكەنىن جانە بولاشاقتا مۇنداي جاعدايلاردىڭ قايتالانباۋى ءۇشىن بارلىق كۇشتەرىن سالاتىندارىن اتاپ ءوتتى. 

"بۇل جاعداي سىزدەر ءۇشىن دە، ءبىز ءۇشىن دە وتە ىڭعايسىز بولدى. بۇل پروبلەما پالەستينا مەن قازاقستاننىڭ تاريحي قارىم-قاتىناسىنا سىزات تۇسىرمەۋىن قالايمىز. ءبىزدىڭ باسشىلىعىمىز بەن پالەستينا حالقى قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ سارابدال ساياساتىن، اراب-يزرايل جانجالىنا قاتىستى قاۋىپسىزدىك كەڭەسىنىڭ، باس اسسامبلەيا، بۇۇ-نىڭ بارلىق رەزوليۋسيالارىن قولداعانىن جوعارى باعالايدى. بولعان جايتتار ءبىزدىڭ قارىم-قاتىناسىمىزعا كەرى اسەرىن تيگىزبەيدى. ءبىز ورتاق ءتىل تابىستىق، جاقىندا سسس كومپانياسىنىڭ يەسى قازاقستانداعى جۇمىس پەن ىنتىماقتاستىقتى جالعاستىرۋ جونىندە سويلەسۋ ءۇشىن وبلىس اكىمىمەن كەزدەسۋگە كەلەدى"،-دەدى پالەستينانىڭ قر-داعى ەلشىسى، دوكتور مونتاسەر ابۋ زەيد.

"تەڭىز كەن ورنىندا بولعان وقيعا كەڭ پەيىل، قوناقجاي قازاق حالقىنىڭ كوڭىلىنە كولەڭكە تۇسىرمەيدى دەگەن ويدامىز. يوردانيا مەن قازاقستان اراسىنداعى ارىپتەستىك جوعارى دەڭگەيدە. ءبىز جۇمىسشىلارىمىزدىڭ كوپ كەشىكپەي جۇمىس ورىندارىنا ورالاتىندارىنا سەنىم بىلدىرەمىز. قازاقستان ۇكىمەتى بۇل ماسەلەدە بىزگە قولداۋ كورسەتىپ وتىر"،- دەدى يوردانيانىڭ قر-داعى ەلشىسى يۋسۋف ابدۋلگاني.

"ءبىز بۇل جەرگە الەۋمەتتىك جەلىلەردە جازىلىپ جاتقانداي ازاماتتارىمىزدىڭ قازاقستاننان كەتۋىن سۇراپ كەلگەن جوقپىز. ليۆان مەن قازاقستاننىڭ دوستىعى بەرىك، ءبىز كەز كەلگەن ماسەلەنى اشىق شەشە الامىز. بۇعان اكىممەن كەزدەسۋىمىز دە مىسال بولا الادى. وسى تاقىرىپتى بىرگە تالقىلاي العانىمىز ءۇشىن اكىمگە جانە اكىمدىكتىڭ رەسمي وكىلدەرىنە ريزاشىلىعىمىزدى بىلدىرەمىز"،- دەدى ليۆاننىڭ قر-داعى ەلشىسى جيسكار ءال-حۋري.

پىكىر قالدىرۋ

قاتىستى ماقالالار