BI Group باسشىسى ايدىن راحىمبايەۆ ءوزىنىڭ الەۋمەتتىك جەلىدەگى پاراقشاسىندا اسحانادا ۇيىقتاپ جاتقان قىزىنىڭ سۋرەتىن جاريالادى دەپ جازادى Qamshy.kz اقپارات اگەنتتىگى.

"بۇل – مەنىڭ قىزىم. ءقازىر وزگە اتپەن، وزگە تەكپەن جۇمىسشىلارعا تاماق جاسالاتىن اسحانادا اسپازدىڭ كومەكشىسى بولىپ جۇمىس جاساپ ءجۇر. اسپازدىڭ ءوزى ىدىس جۋىپ، كارتوپ اشىپ جۇرگەن قىزدىڭ كىمنىڭ بالاسى ەكەنىن بىلمەيدى. سوندىقتان، ەكى اپتادان بەرى ولاردى 12 ساعاتتىق جۇمىس رەجيمىمەن جۇمساۋدا. تاڭەرتەڭنەن باستاپ 50 كەلى كارتوپ، 14 كەلى پياز، 16 كەلى ءسابىز ارشۋ، باسقا دا نارسەلەر ءپىسىرۋى قاجەت. كۇنىنە 200-دەن استام ىدىس جۋۋ كەرەك. ۇيقىسى قانباي، شارشاپ ءجۇر. ءبىراق 14 جاستان باستاپ جۇمىس جاساۋ - ءبىزدىڭ اۋلەتتىڭ داعدىسى.

مەن بۇل تۋرالى "ارىپتەستەرىم ءبىلىپ قويىپ، جۇمىس جاساتپاي قويادى" دەپ جازباي كەلگەنمىن. ءبىراق ەكىنشى قىزىم امينا وسى فوتونى جىبەرگەندە، شىداي المادىم. "ۇيىقتاي الدىڭ با؟" دەپ سۇراپ ەدىم، "قايداعى! مارال تاتە ىدىستى جۋىڭدار دەپ ايقايلادى!" دەپ جاۋاپ بەردى. 

...ارينە، بالالارىما جانىم اشيدى. ءبىراق وسى ىستەگەن جۇمىسى كەيىن ومىرلەرىندە ۇلكەن كومەك بولادى دەپ سانايمىن. ءۇش بالامنىڭ تاجىريبەسى تۋرالى كەيىنىرەك تولىق جازامىن. ۇلىم دا باسقا تەكپەن 9 قاباتتا تاس قالاۋشىنىڭ بريگاداسىندا جۇمىس جاساپ ءجۇر"، - دەلىنگەن جازبادا. 

جەلى قولدانۋشىلارى ايدىن راحىمبايەۆقا العىس ايتىپ، بالالارىنىڭ ەڭبەكقورلىعىنا ءتانتى بولعاندارىن جاسىرمادى.