ارىس وڭىرىندە بولعان جارىلىستىڭ سالدارىنان زارداپ كورگەن ۇيلەردى قالپىنا كەلتىرۋ بويىنشا، ارىس قالاسىن بىرنەشە سەكتورعا بولگەن بولاتىن. اتىراۋ وبلىسىنىڭ ۇلەسىندەگى سەكتوردا بۇگىنگى كۇنى جۇمىستار اتقارىلۋدا دەپ حابارلايدى Qamshy.kz اقپارات اگەنتتىگى اتىراۋ وبلىسىنىڭ وڭىرلىك كوممۋنيكاسيلار قىزمەتىنە سىلتەمە جاساپ.

ارىس قالاسىندا ورىن العان اسكەري قويماداعى ءوق-دارىنىڭ جارىلۋ سالدارىنان بولعان زارداپتى جويۋ بويىنشا جۇمىستار جۇرگىزىلىپ جاتىر. اتىراۋ وبلىسىنا بولىنگەن سەكتوردا 482 ءۇيدى قالپىنا كەلتىرۋ جۇمىستارى بار. سونىڭ ىشىندە 24 ءۇي جارىلىستىڭ سالدارىنان مۇلدەم جويىلعان. ال، قالعان ۇيلەردىڭ تەرەزەلەرى، توبەلەرى جانە ىشكى قۇرىلىستارى سىنعان. قازىرگى تاڭدا سول جۇمىستاردى قالپىنا كەلتىرۋ ءۇشىن وبلىس اكىمىنىڭ ورىنباسارى، وبلىس اكىمىنىڭ كەڭەسشىسى جانە باسقارما باسشىلارى ارىس قالاسىنا بارىپ، تولىق قاندى جۇمىستار اياقتالعانعا دەيىن ارىس وڭىرىندە بولاتىن بولادى. اتىراۋ وبلىسىنىڭ اكىمى نۇرلان نوعايەۆتىڭ ايتۋىنشا، جوندەۋ جۇمىستارىنا تەحنيكالار مەن 500-گە جۋىق ادام جۇمىلدىرىلعان.

- ارىستاعى توتەنشە جاعداي ورىن العاننان كەيىن، اتىراۋلىقتاردا كومەك كورسەتۋ شاراسىنا بەلسەندى ارالاسىپ كەتتى. اتاپ ايتقاندا، كاسىپكەرلەردىڭ،مەملەكەتتىك قىزمەتكەرلەردىڭ، تۇرعىنداردىڭ اشىلعان شوتقا اۋدارعان 100 ملن-داي قاراجاتى بۇگىنگى كۇندە اۋدارىلىپ وتىر. ودان باسقا، اتىراۋلىقتاردىڭ جيناعان ازىق-تۇلىگى ،كيىم-كەشەگى،باسقادا تۇرمىستىق جاعدايعا قاجەت زاتتاردىڭ 4 جۇك ماشيناسى ارىسقا جەتكىزىلدى. اتىراۋلىقتار «ارىس،ءبىز بىرگەمىز» اكسياسىنىڭ قاتىسۋشىلارى رەتىندە، ارىستاعى جاعداي تولىعىمەن بىتپەيىنشە، كومەك بەرۋ ءىس-شارالارىن ءارى قاراي جالعاستىرا بەرەتىن بولامىز، دەيدى اتىراۋ وبلىسىنىڭ اكىمى نۇرلان نوعايەۆ.