بۇعان دەيىن الماتىدا قىزداردى اقشاعا شەشىندىرگەن بلوگەر ايجان بايزاقوۆانىڭ كلۋبىن ورتەيمىز دەپ ءبىر توپ ساقالدى جينالىپ، شۋ شىعارعان بولاتىن. بلوگەر ءارى زاڭگەر ايگۇل ورىنبەك شىمكەنتتەگى ارىستىقتاردىڭ ميتينگىسىندە جۋرناليستەردى ساقالدىلار ساباعانىن ايتادى. بۇل تۋرالى ول SN.kz اقپاراتتىق پورتالىنا بەرگەن سۇحباتىندا ايتتى دەپ جازادى Qamshy.kz اقپارات اگەنتتىگى.

ونىڭ ايتۋىنشا، ميتينگىدە تاپسىرمامەن كەلىپ، حالىقتى قىلمىسقا ۇگىتتەپ جۇرگەن ارنايى توپ بار. 

"25 ماۋسىم كۇنى "Vlast.kz" جۋرناليستەرىن ۇرىپ، كامەرالارىن سىندىردى. مەن دە سول جەردە بولعانمىن. تىكەلەي ەفير جۇرگىزىپ جاتقان كەزىمدە "بۇل «حابار" ارناسىنىڭ ءتىلشىسى، بيلىكتىڭ ادامى" دەپ ماعان دا قول كوتەرگەن"، – دەپ باستادى ءسوزىن زاڭگەر.

ايگۇل ورىنبەك ءوزىنىڭ ارىس قالاسىنىڭ تۇرعىنى ەكەنىن، الايدا نارازىلىقتى باستاپ جۇرگەندەردىڭ اراسىندا ارىستىقتاردىڭ وتە از ەكەنىن جەتكىزدى. 

"ارىستىقتار وتە از. سوسىن ۇرعانداردى سوڭىنا دەيىن باقىلادىم. ولار مەملەكەتتىك ءنومىرى 02 (الماتى) دەگەن كولىككە ءمىنىپ كەتتى. 

جالپى ولار مەشىت جانىندا 25 ماۋسىمنان باستاپ ۇگىت-ناسيحات جۇرگىزگەن. 27ء-سى كۇنى ارىستىقتار وسىلاردىڭ ايداپ سالۋىمەن، اشۋ-ىزامەن نارازىلىققا شىقتى"،  – دەيدى بلوگەر. 

ءدىني اعىمدار جايلى ءجيى ماسەلە كوتەرەتىن بلوگەر ۇگىتشىلەر دەپ اتاعان ادامداردىڭ بەتپەردەسى ءالى اشىلماعانىن ايتادى. 

"ەلوردا بولسىن، ارىستاعى بولسىن، بارلىعىندا ساقالدىلار ءجۇر عوي. 6-سى كۇنى شىمكەنتتە وتكەن ميتينگىدە مەنىڭ تەلەفونىمدى سىندىرعان ساقالدى جىگىتتەردى ۇستاپتى"،  – دەيدى ول. 

ءقازىر كۇدىكتىگە قاتىستى تەرگەۋ جۇرگىزىلىپ جاتىر ەكەن.