اتىراۋ وبلىسىنىڭ اكىمى نۇرلان نوعايەۆ گەرمانيا فەدەراتيۆتىك رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى تيلو كليننەرمەن كەزدەستى دەپ حابارلايدى Qamshy.kz اقپارات اگەنتتىگى وڭىرلىك كوممۋنيكاسيالار قىزمەتىنە سىلتەمە جاساپ.

كەزدەسۋدە ەكى ەل اراسىنداعى الەۋمەتتىك، مادەني جانە ەكونوميكالىق سالالارداعى ەكىجاقتى قارىم-قاتىناستىڭ دامۋ قارقىنى تالقىلاندى.

ايماق باسشىسى گەرمانيا وكىلىنە اتىراۋ وڭىرىندەگى ينۆەستيسيالىق مۇمكىندىكتەر مەن شەتەلدىك ينۆەستورلار ءۇشىن قازاقستان تاراپىنان قويىلاتىن شارتتار تۋرالى ايتىپ بەردى.

"ەلباسى مەن قازاقستان پرەزيدەنتىنىڭ تاپسىرماسى بويىنشا ەلىمىزدە ينۆەستورلار ءۇشىن قولايلى جاعدايلار جاسالۋدا. وزدەرىڭىز كورىپ جۇرگەندەرىڭىزدەي اتىراۋ وبلىسىنىڭ بازارلارىندا ءار ءتۇرلى ەلدەردەن كەلگەن ءىرى كومپانيالار تابىستى جۇمىس ىستەۋدە. بۇل ءبىر مىڭنان استام شەتەلدىك كومپانيالار. ءبىزدىڭ وڭىرىمىزدە نەمىس كاپيتالىنىڭ ۇلەستىك قاتىسۋىمەن 24 كاسىپورىن ءوز قىزمەتىن جۇزەگە اسىرىپ كەلەدى.

بۇگىنگى تاڭدا اتىراۋ وبلىسى مەن گەرمانيا اراسىنداعى تاۋار اينالىمى 53 ميلليون دوللاردى قۇراپ وتىر. ءبىزدىڭ پىكىرىمىزشە، بۇل ءبىزدىڭ وبلىسىمىز بەن ءسىزدىڭ ەلىڭىزدىڭ اراسىنداعى بارلىق الەۋەتتى كورسەتپەيدى. تاۋار اينالىمىن دامىتۋ جانە ارتتىرۋ ءۇشىن جاقسى جۇمىستار بار. ءسىزدىڭ ساپارىڭىز جانە نەمىس بيزنەس وكىلدەرىنىڭ كەزدەسۋىنە قاتىسۋىڭىز، جاڭا جوبالاردى جۇزەگە اسىرۋعا مۇمكىندىك بەرەدى دەپ ۇمىتتەنەمىن"،- دەدى نۇرلان نوعايەۆ.

وبلىس اكىمى گەرمانيا ەكونوميكاسىنا شاعىن جانە ورتا بيزنەس ەلەۋلى ۇلەس قوساتىنىن اتاپ ءوتتى. بىرلەسكەن جوبالار كۇمانسىز ءبىزدىڭ ەلىمىزدىڭ ەكونوميكاسىنا پايدالى بولادى.
ءوز كەزەگىندە گەرمانيا فەدەراتيۆتىك رەسپۋبليكاسىنىڭ قازاقستانداعى ەلشىسى تيلو كلينەر وبلىس اكىمىنە نەمىس بيزنەسىنىڭ وكىلدەرىن قابىلداپ، ولاردىڭ اتىراۋ نارىعىنا قاتىسۋىن كەڭەيتۋگە مۇمكىندىك بەرگەنى ءۇشىن العىسىن ءبىلدىردى.

"گەرمان بيزنەسى ءوزىنىڭ جوعارى ارتاراپتاندىرىلۋىمەن ەرەكشەلەنەدى. سوندىقتان ءبىز وسى كەزدەسۋگە ەكونوميكانىڭ ءتۇرلى سەكتورلارىندا جۇمىس ىستەيتىن كومپانيالاردى شاقىردىق. قازاقستان ءبىزدىڭ ەلمەن تاۋار اينالىمىندا وڭ سالدوسى بار ساناۋلى ەلدەردىڭ ءبىرى. ءقازىر ءبىز ءوزارا ءتيىمدى ىنتىماقتاستىقتى جاقسارتىپ،سونداي-اق ءارى قاراي دا جاقسارتاتىن كەزەڭدە تۇرمىز"،- دەيدى تيلو كليننەر.

ەلشى مىرزا ەلىنىڭ ءبىزدىڭ كومپانيالارىمىزدىڭ ەكونوميكالىق بايلانىستارىن كەڭەيتۋگە جانە شاعىن جانە ورتا بيزنەستى، سونداي-اق بيزنەس-ارىپتەستىكتى ودان ءارى دامىتۋعا مۇددەلى ەكەنىن اتاپ ءوتتى.

اتىراۋعا گەرمان ەكونوميكاسى وداعىنا قوسىلعان 20-دان استام كومپانيا كەلدى. بۇل قۇرىلىم ەكونوميكانىڭ ءتۇرلى سالالارىندا – مەديسينا، ءبىلىم بەرۋ، اگرارلىق سەكتور، كوممۋنيكاسيا، تاۋ-كەن ءوندىرىسى سالالارىندا ءوزارا ءتيىمدى ىنتىماقتاستىق ءۇشىن نەعۇرلىم ءتيىمدى جول بەرەدى.

كەزدەسۋ سوڭىندا وبلىس اكىمى نۇرلان نوعايەۆ بيزنەس-قۇرىلىمدار وكىلدەرىنە، جەرگىلىكتى اتقارۋشى بيلىك ءوڭىردىڭ ەكونوميكاسىن دامۋى ءۇشىن ءتيىمدى جوبالار ءۇشىن كەلىسسوزدەرگە دايىن ەكەنىنە سەندىردى.