22-شىلدەدە مۇنايلى استانانىڭ ورتالىعىندا ستاسيونارلى پوليسيا بەكەتىنىڭ سالتاناتتى اشىلۋى ءوتتى دەپ جازادى Qamshy.kz اقپارات اگەنتتىگى اتىراۋ وبلىسىنىڭ وڭىرلىك كوممۋنيكاسيالار قىزمەتىنە سىلتەمە جاساپ.
وبلىس اكىمىنىڭ ءبىرىنشى ورىنباسارى سەرىك شاپكەنوۆ بۇل بەكەتتەر ارقىلى پوليسيا ۋچاسكەلىك ينسپەكتورلارى تاۋلىك بويىنا وزدەرىنە بەكىتىلگەن اۋماقتاردا حالىقپەن تىعىز قارىم-قاتىناستا بولىپ، پوليسيانىڭ حالىققا قاجەت جاعدايدا دەرەۋ كومەككە كەلۋىنە، قۇقىقبۇزۋشىلىقتاردىڭ بارلىق تۇرىنە دەرەۋ ارەكەت ەتۋگە جول اشادى دەگەن سەنىمىن ءبىلدىردى.
"كەز كەلگەن ايماقتىڭ دامۋ دەڭگەيى ونىڭ قوعامدىق ءتارتىبىنىڭ تۇراقتىلىعىمەن جانە ازاماتتاردىڭ قۇقىعىن قامتاماسىز ەتۋىمەن انىقتالادى. جەرگىلىكتى اكىمدىك تاراپىنان بۇل باعىتتاعى ەل پرەزيدەنتىنىڭ تاپسىرماسى تولىقتاي ورىندالىپ جاتقاندىعىن جانە ورگانداردىڭ مارتەبەسىن ارتتىرۋ باعىتىندا ءبىراز شارۋا اتقارىلۋدا. بۇگىنگى كورسەتىلگەن قولداۋ ولاردىڭ حالىق الدىنداعى مىندەتتەرىن ەش كەدەرگىسىز، ادال ورىنداۋلارىنا وڭ اسەرىن تيگىزەدى دەگەن سەنىمدەمىن"،- دەيدى سەرىك شاپكەنوۆ.
وبلىس پروكۋرورى حاليدۋللا داۋەشوۆتىڭ ايتۋىنشا، جوبا اياسىندا وسىنداي ستاسيونارلى پوليسيا بەكەتتەرى اشىق، حالىققا كورىنەتىن جانە ىڭعايلى ورىنداردا، ەركىن تۇردە كىرۋگە مۇمكىندىك بەرەتىن، حالىق پەن پوليسيا قىزمەتكەرلەرىنىڭ قاۋىپسىزدىك تالاپتارىنا ساي جەرلەردە ورناتىلاتىن بولادى.
"جوبا جەرگىلىكتى اتقارۋشى جانە پروكۋراتۋرا ورگاندارىمەن بىرلەسىپ ازىرلەنگەن. بەكەت قىلمىستىلىق كارتاسىمەن، زامانعا ساي جابدىقتارمەن، كومپيۋتەرمەن جانە ق ر ءىىم-نىڭ ارنايى بازاسىمەن قامتاماسىز ەتىلەدى. بولاشاقتا وسى بەكەتتەردىڭ تاۋلىك بويىنا جۇمىس جاساۋى قىلمىستىلىقتى تەجەيتىن فاكتورلاردىڭ ءبىرى بولماق، كەز كەلگەن قۇقىق بۇزۋشىلىققا جەدەل ارەكەت ەتىپ، وبلىس ورتالىعىنداعى قوعامدىق ءتارتىپتى ساقتاۋدى قامتاماسىز ەتەدى"،- دەيدى اتىراۋ قالااسىنىڭ پروكۋرورى ارشات تايتۋللين.
پىكىر قالدىرۋ