اتىراۋعا جۇمىس جاساۋعا كەلگەن قىزىلوردا وبلىسىنىڭ تۇرعىنى وزىندە بار زاتتارىن تۇگەلىمەن جوعالتىپ الدى. قۇجاتتار مەن اقشاسى سالىنعان سومكەسىن تاكسيدە ۇمىتىپ كەتكەن.
"تەلەفونىم قالتامدا قالدى. جۇمىستى ۋايىمدايمىن دەپ تاكسيدەن تۇسەردە جانىمدا تۇرعان سومكەمدى الۋعا دا ۇمىتىپ كەتكەن بولۋىم كەرەك. جۇمىسقا كەلەردە تۋىستارىمنان قارىزعا 50 مىڭ تەڭگە العان بولاتىنمىن، وزىمدە 20 مىڭ
تەڭگە اقشام بولدى. قاس قاعىم ساتتە قۇجاتسىز، اقشاسىز قالىپ قويدىم. ال، ءوزى تاڭعى 4-تە تەڭىز ۆاحتالىق قالاشىعىنا كەتۋىم قاجەت، وتكىزۋ قۇجاتتارىن راسىمدەتىپ قويعانمىن. قاتتى قوبالجىدىم، تاكسيگە جولاي مىنگەندەر زاتتارىمدى الىپ قويسا، كەرى قايتارمايتىن ەدى"،- دەپ جاعدايىن باياندادى كۇلايشا اسقاروۆا.
"مەن توقتاعان پاتەردىڭ يەسى پوليسيا كومەكتەسەدى دەپ 102-گە قوڭىراۋ شالدى. 20 مينۋت وتكەننەن كەيىن "جەدەل باسقارۋ ورتالىعىنا كەلىڭىز. ءسىز كورسەتكەن مەكەنجاي بويىنشا اۆتوكولىكتىڭ مەملەكەتتىك بەلگىسىن انىقتادىق. ءقازىر جۇرگىزۋشىنى شاقىرتىپ جاتىرمىز" دەپ پوليسيادان حابارلاسقاندا وز-وزىمە سەنبەدىم"،- دەپ قۋانىشىن جاسىرا الماعان قىزىلوردا وبلىسىنىڭ تۇرعىنى پوليسەيلەرگە العىسىن قالالىق پوليسيا باسقارماسى عيماراتىنىڭ الدىندا بەينەجازبامەن جولدادى.
قۇجاتتارى مەن سومكەسى ەش شاشاۋ شىقپاستان كۇلايشاعا قايتارىلدى. ەسكە سالا كەتسەك، ءقازىر اتىراۋ قالاسىندا جەدەل باسقارۋ ورتالىعىنا قوسىلعان 759 بەينەباقىلاۋ كامەراسى جۇمىس جاساپ تۇر.
