ەڭبەك نارىعىنداعى جاعداي، جۇمىسسىزدىق، جاڭا سالالارعا ماماندانۋ جايىن ءسوز ەتكەن «HeadHunter.kz» ءجشس-نىڭ باس ديرەكتورى نينا بىچەنكونىڭ forbes.kz-كە بەرگەن سۇقباتىنداعى پايدالى اقپاراتتاردى ىقشامداپ، وقىرمانمەن ءبولىسۋدى ءجون كوردىك.

سايتتىڭ 2 ملن-نان استام تۇيىندەمە، بوس جۇمىس ورىندارى تۋرالى 100 مىڭنان استام حابارلاندىرۋ، 50 مىڭنان استام كومپانيادان تۇراتىن دەرەكتەر قورى بەلگىلى ءبىر دەڭگەيدە ەڭبەك نارىعىنداعى جاعدايعا ۇڭىلۋگە مۇمكىندىك بەرەدى.

نينا بىچەنكونىڭ ايتۋىنشا، جۇمىس بەرۋشىلەردىڭ جۇمىس ىزدەۋشىلەرگە دەگەن تالابى ءبىرشاما وزگەرگەن. بارلىق سالاعا سيفرلاندىرۋ ءۇردىسى باتىل ەنىپ جاتقاندىقتان، جۇمىس بەرۋشىلەر قوسىمشا داعدىلاردى مەڭگەرگەن، جاڭا تەحنولوگيالاردى جەڭىل ۇيرەنەتىن، كوپقىزمەتتى قاتار اتقاراتىن، ءتۇرلى جاعدايعا يكەمدى كادرلاردى ىزدەيدى. بۇرىنعىداي «جاۋاپكەرشىلىگى مول»، «ماقساتشىل»، «ءتىل تابىسقىش» دەگەن سياقتى جالپى سيپاتتار ەمەس، ناقتى قولدان كەلەتىنى تالاپ ەتىلەدى.

ءوز كەزەگىندە جۇمىس بەرۋشىلەرگە قويىلاتىن تالاپ تا جوعارى. كومپانيالارعا ءوزىن ءتورت تاعانداپ تۇرعان تۇراقتى ەتىپ كورسەتۋ العاشقى ورىنعا شىققان. ويتكەنى بىلىكتى كادرلار ءۇشىن جۇمىس بەرۋشىنىڭ مارتەبەسى مەن ونىڭ تارتىمدىلىعى اسا ماڭىزدى.

جۇمىس بەرۋشىلەر اراسىندا تانىمال ماماندىقتاردىڭ بەستىگىن ساتۋ سالاسىنىڭ ماماندارى، ەسەپشىلەر، اكىمشىلىك پەرسونالدار (كەڭسە-مەنەدجەرى، حاتشى)، IT ماماندار جانە ماركەتينگ سالاسىندا تەر توگىپ جۇرگەندەر قۇرايدى.

بۇگىندە ادامداردىڭ 60 پايىزى وقىعان ماماندىقتارى بويىنشا جۇمىس ىستەمەيدى ەكەن ءبىراق ءبىر ماماننىڭ ورنىن باسقا ماماندىقتان كەلگەندەر الماستىرىپ جاتقاندىقتان نارىقتا مامانداردىڭ ارتىقتىعى سەزىلمەيدى. ال ءوز ءىسىنىڭ بىلگىرلەرى مەن تالانتتار بارلىق سالادا جەتىسپەيدى.

سايت كەلتىرگەن دەرەككە سەنسەك، تۇيىندەمەلەرىن جاريالايتىنداردىڭ دەنى جۇمىسسىز جۇرگەندەر ەمەس، قايدا جاقسىراق جاعداي ۇسىنادى دەگەن ويمەن باسقا جۇمىس ورىندارىن ىزدەۋشىلەر. سوندىقتان 2 ملن تۇيىندەمە 2 ملن ادام جۇمىسسىز دەگەندى بىلدىرمەيدى.

نينا بىچەنكو فۋتۋرولوگتاردىڭ كەيبىر ماماندىقتار 10-20 جىلدا جويىلادى دەگەن پايىمىن تەرىسكە شىعاردى. ونىڭ ويىنشا، ەسكى ماماندىقتار جاڭارىپ، تۇرلەنىپ وتىرادى. جوعالىپ، جويىلۋى نەعايبىل. ايتالىق، جۇمىس بەرۋشىلەر ەندىگىدە جاي عانا ماركەتولوگقا ەمەس، ينتەرنەت-ماركەتولوگ، ساراپشى-ماركەتولوگتارقا كوبىرەك قىزىعۋشىلىق تانىتادى.

ياعني، ماماندىققا قاتىستى قوسىمشا داعدى مەڭگەرگەن، وزگەلەر بىلمەگەندى ۇيرەنگەن، ءوزىن جەتىلدىرىپ، جاڭا سىنداردار سۇرىنبەي وتە الاتىن مامان جەردە قالمايدى دەيدى سايت ديرەكتورى.