پەتروپاۆل قالاسىنىڭ قالا قۇرىلىسى كەڭەسىنىڭ وتىرىسىندا دەموگرافيالىق مالىمەتتەر ءسوز بولدى. اتاپ ايتار بولساق، سولتۇستىك قازاقستان وبلىسىنىڭ ورتالىعىنداعى حالىق سانى 2050 جىلى قازىرگى 220 مىڭ ادامنان 320 مىڭ ادامعا ارتاتىنى ايتىلدى.

شىندىعىنا كەلەر بولساق، بۇل ۇلكەن كۇمان تۋدىرادى. پەتروپاۆل – سوڭعى 30 جىلدا حالىق سانىن جوعالتقان ەلىمىزدەگى جالعىز وبلىس ورتالىعى. قالا – ەگدە تارتقان ادامدار سانى كوپ، ال بالالار سانى ەڭ از وبلىس ورتالىعى. بيىلعى جىلى قالاداعى حالىق سانىنىڭ تابيعي ءوسىمى 300 ادامنان ارەڭ اسادى، ال كوشى-قون سالدوسى كەرى كورسەتكىش كورسەتىپ وتىر جانە ءبىرىنشى كورسەتكىشتەن ەكى ەسە اسىپ تۇسەدى. مۇنىڭ بارلىعى بەس جىلدان بەرى ەلىمىزدىڭ وڭتۇستىگىنەن حالىقتى كوشىرۋ باعدارلاماسىن ەسەپكە العاندا بولىپ وتىرعان جايت.

جالپى قالا مەن وبلىستا سىرتقى ەميگراسيا مەن باسقا وڭىرلەرگە كوشۋ جوعارى ەكەنى بايقالىپ وتىرعانى ءبىرىنشى رەت ەمەس. وسىدان بىرنەشە جىل بۇرىن وبلىستىڭ كەي اۋداندارىنداعى رەسەيلىك جوو-عا تۇسكەن ورتا مەكتەپ تۇلەكتەرىنىڭ سانى 70%-عا جەتكەنى تۋرالى اقپارات بولعان ەدى. ال بۇگىنگى كۇنى پەتروپاۆلدىڭ وزىندەگى رەسەيلىك جوو-عا تۇسكەن كەيبىر ورتا مەكتەپ تۇلەكتەرىنىڭ سانى 80%-عا جەتىپ وتىر. رەسەيلىك ينستيتۋتتاردى بىتىرگەن سولتۇستىك قازاقستاندىقتاردىڭ باسىم بولىگى ەلگە ورالمايدى.

حالىقتىڭ كەتۋ اعىنى توقتاماي تۇرعان جانە تابيعي وسىمىندە پروبلەما بار قالانىڭ دەموگرافيالىق كەلەشەگى قانداي بولۋى مۇمكىن؟ ونىڭ ۇستىنە، پەتروپاۆل سۋبتروپيكتە ورنالاسپاعان. بۇل وڭىردە قىس ۇزاق جانە سۋىق. حالىق سانىنىڭ 45%-عا ءوسۋى جايلى اڭگىمە بولۋى دا مۇمكىن ەمەس.