راسىندا دا بۇل كەڭەستىڭ ماڭىزى وتە زور بولىپ وتىر. ويتكەنى قوعامدا قوردالانىپ قالعان ماسەلەلەر بار. ونى جوققا شىعارۋعا بولمايدى. ءبىراق ول قالاي شەشىلۋى ءتيىس؟ مۇنىڭ بارلىعى الداعى ۋاقىتتا ناقتىلانادى دەپ ويلايمىن.
جالپى حالىق قوعامدىق كەلىسىم جونىندەگى ۇلتتىق كەڭەستىڭ قۇرىلۋىنا ەش قارسى ەمەس. ءبارى دە قولدايدى. دەگەنمەن اتالعان كەڭەس جىلىنا قانشا رەت وتكىزىلەدى، جوق الدە بۇل اي سايىن وتكىزىلەتىن وتىرىس پا؟ مۇنىڭ بارلىعى دا الداعى ۋاقىتتا ناقتىلانادى دەپ ويلايمىن. دەسەك تە، قازىردەن بايقالعان ءبىر نارسە بار. بۇگىندە الەۋمەتتىك جەلى مەن قوعامدىق ورتادا بەلسەندى بولىپ جۇرگەن كوپتەگەن ازاماتتار نەگىزىنەن وزدەرى ايتىپ جۇرگەن ماسەلەلەردى وتىرىستا كوتەرەدى دەپ ويلايمىز. قوعامدا ءجيى ايتىلىپ جۇرگەن پىكىرلەرگە مونيتورينگ جاساي كەلە ءبىز ۇلتتىق كەڭەستە مىنانداي ورتاق تاقىرىپتار كوتەرىلۋى مۇمكىن دەپ ويلايمىز. بۇل جەردە ءبىز جۇرتشىلىق تاراپىنان ءجيى ايتىلىپ جۇرگەن جايتتاردى جيناقتاپ، ايتىپ وتىرمىز. سونىمەن...
- مەملەكەتتىك ءتىلدىڭ مارتەبەسىن ارتتىرۋ تۋرالى ماسەلە مىندەتتى تۇردە ءسوز بولادى.
- «ب ا ق» تۋرالى، «سايلاۋ تۋرالى»، «جەرگىلىكتى ءوزى-وزى باسقارۋ تۋرالى» زاڭدارعا وزگەرىستەر ەنگىزۋ.
- ءسوز بوستاندىعى، بەيبىت ميتينگكە رۇقسات بەرۋ. بۇل دا وتىرىستا ءبىرقاتار بەلسەندىلەر تاراپىنان ءسوز بولىپ، قوزعالۋى مۇمكىن.
- اباقتىدا جاتقان ءبىرقاتار ازاماتتار بوستاندىققا شىعارۋ ماسەلەسى دە كوتەرىلەدى.
- قوعامداعى سىبايلاس جەمقورلىقتى جويۋ ماسەلەسى دە ۇلتتىق كەڭەستىڭ ەڭ وزەكتى تاقىرىبىنىڭ ءبىرى بولماق.
- جاستار اراسىنداعى جۇمىسسىزدىق – بۇل دا وزەكتى پروبلەمانىڭ ءبىرى.
- اكىمدەردىڭ اشىقتىعى جانە حالىققا جاقىندىعى نەمەسە قوعامدا كەزدەسىپ قالاتىن بيۋروكراتيالىق جۇيەنى جويۋ ماسەلەسى دە ءسوز بولادى.
- باسپانانىڭ جايى دا كەڭەسكە مۇشە بولاتىنداردى تولىق تولعاندىرۋى ءتيىس.
- جەر ماسەلەسى دە قايتا قوزعالۋى ىقتيمال
ءبىزدىڭ ويىمىزشا، تالقىلاناتىن جايتتار مۇنىمەن شەكتەلىپ قالماق ەمەس. ماسەلەلەر كوپ. ءبىراق بەلگىلى ءبىر تالقىلانعان تاقىرىپ بويىنشا ۇلتتىق كەڭەستىڭ مۇشەلەرى ورتاق تۇجىرىمعا كەلە الا ما؟ قالاي ايتقاندا دا، ۇلتتىق كەڭەستىڭ وتىرىسى ەكى تىلدە جۇرەدى. قازاق جانە ورىس تىلىندە. بۇل ەندى شىندىق. دەمەك، كوتەرگەن ماسەلەنى ايتۋ بار دا، ونى قابىلداۋ بار. وسى جەردە ايتا كەتەتىن ءبىر جايت، وتىرىستا ءبىر بەلسەندىنىڭ كوتەرگەن پىكىرى ۇلتتىق كەڭەستىڭ ەكىنشى ءبىر مۇشەسىنە ماسەلە بولىپ كورىنبەۋى مۇمكىن. مۇنداي جاعدايدا قايتپەك كەرەك؟ ۇلتتىق كەڭەس مۇشەلەرى قاي ءبىر تاقىرىپتى تالقىلاسا دا، ول قوعام، حالىق ءۇشىن ۇلكەن قوماقتى پروبلەما ەكەندىگىن ۇمىتپاۋىمىز كەرەك. سوندىقتان كەڭەستە كوتەرىلگەن ماسەلە كولەڭكەدە قالماسا ەكەن دەيمىز. سوندا ۇلتتىق كەڭەسكە سەنىم ارتادى. ال پرەزيدەنت توقايەۆتىڭ جارلىعىمەن قۇرىلعان ۇلتتىق كەڭەس قوعام سۇرانىسىنان تۋىپ وتىر. سوندىقتان بۇل وتىرىستان كوپ ءۇمىت كۇتەمىز.
پىكىر قالدىرۋ