ماۋسىم ايىنىڭ ورتا شەنىندە شىعىس ءسىبىردىڭ يركۋت وبلىسى، كراسنويار ايماعى، ساحا رەسپۋبليكاسى كولەمىندە اۋقىمدى ورمان ءورتى باستالدى. نۋ جىنىستى جويماق بولىپ وڭمەڭدەگەن قىزىل جالىننان شىققان ءتۇتىن كورشى وبلىستارعا، ءتىپتى شەكارالاس مەملەكەتتەرگە دەيىن جەتتى. ال الەۋمەتتىك جەلىدەگى حالىق ورماندى قۇتقارۋدى سۇراپ، بىرىنەن كەيىن ءبىرى سۇراپ شۋلاۋدا.

«وسىدان بىرەر اي بۇرىن پاريج قالاسىنداعى «نوتر-دام» شىركەۋى ورتكە ورانعاندا كۇللى الەمنىڭ نازارى ءتۇسىپ، قارجى جيناپ ەدى. ال تابيعات كەرەمەتىن قۇربان ەتىپ قاراپ وتىرعانىمىز جارامادى». كوپشىلىكتىڭ پىكىرى وسى تۇستا بىرىگىپ وتىر.

ءسىبىر ورماندارىندا جىل سايىن ءورت تۇتانىپ، مىڭداعان گەكتار جەردى جايپاپ وتەدى. ءار جىل سايىن ەرىكتىلەر ءورتتىڭ الدىن الۋ شارالارىن جۇرگىزەتىنى دە وتىرىك ەمەس. ءبىراق بۇل جىلى ءورتتىڭ جىلدام كۇش العانى سونشالىق، يركۋت وبلىسىنىڭ تۇرعىندارى باسقا جەرگە قونىس اۋدارىپ تا ۇلگەرمەگەن. ءتۇتىن جۇتىپ، ىس يىسكەپ وتىر-مىس.

ءورت اسا ۇلكەن جىلدامدىقپەن تارالىپ كەلەدى. ءتىپتى، بودايبو اۋدانىنا قاراستى سۆەتلىي اۋىلىنا ءۇش قانا شاقىرىم قالعان. دەگەنمەن، باسشىلىق ەلدى-مەكەندەرگە تونەر ءقاۋىپ جوق دەپ سەندىرۋدە. حالىق قونىستانعان كەي قالالار ورمان ءتۇتىنىنىڭ اسەرىنەن اۋە رەيستەرىن توقتاتۋعا ءماجبۇر بولعان.

قازىرگى ۋاقىتتا كراسنويار ولكەسىنە جاقىن ماڭدا 850 مىڭ گەكتار تايگا ورمانى ورتەنگەن. بۇل – 24-شىلدەدەگى كورسەتكىش. ال ءدال ءقازىر بۇل كورسەتكىش ەسەلەنبەسە، ازايماعانى انىق. رەسپۋبليكاداعى ەڭ ءىرى ءورت ءسوندىرۋ ورتالىعى ورنالاسقان بۇل ولكەنىڭ حالقى تۇتىنگە تۇنشىعىپ وتىرۋى – ۇيات.