جىل باسىنان بەرى وبلىس اۋماعىندا 126 ءورت  وقيعاسى تىركەلگەن. بۇل كورسەتكىش  2018 جىلمەن سالىستىرعاندا  10%-عا ازايىپ وتىر.  ورىن العان وقيعالاردان  2 ادام قازا تاۋىپ، 4 ادام زارداپ شەككەن. دەرەكتەرگە سۇيەنسەك،  تىركەلگەن  ءورت وقيعاسىنىڭ كوپ بولىگى تۇرعىن ۇيلەردە ورىن العان. سونداي-اق، اۆتوكولىكتەردە دە 44  ءورت وقيعاسى بولدى. مامانداردىڭ ايتۋىنشا،  ءورت وقيعالارىنىڭ الدىن الىپ، ازايتۋ ماقساتىندا تۇرعىندارعا وتكىزىلگەن ۇگىتتەۋ-پروفيلاكتيكالىق جۇمىستار ناتيجەسىندە ءورت سانى الدىڭعى جىلمەن سالىستىرعاندا  20%-عا ازايعان. بۇگىندە ادامداردىڭ قازا بولۋىن، جاراقاتتانۋىن الدىن الۋ جانە ءورت وقيعالارىنىڭ سانىن ازايتۋ ماقساتىندا تۇرعىندارعا قاۋىپسىزدىك ەرەجەسىن تۇسىندىرۋگە كوپ كوڭىل بولىنگەن. اتاپ  ايتساق، سەنبىلىكتەر وتكىزىلىپ، ءۇي يەلەرىنە جادىنامالار تاراتىلىپ، رەيدتەر جۇرگىزىلگەن.

«ءورت ءقاۋپى باسىم شىلدە-تامىز ايلارىندا ءورت وشاقتارىن انىقتاۋ ماقساتىندا عارىشتىق مونيتورينگ جۇرگىزىلمەك. جوسپارعا سايكەس، وبلىستىق اكىمدىكتەن 4 ملن تەڭگە ءبولىنىپ، ءتيىستى  جۇمىستار اتقارىلماق. ءورت وشاعىن ەرتەرەك انىقتاپ، كەزەكشىلەرگە دەر كەزىندە عارىشتىق مونيتورينگ ارقىلى دابىل قاعىلعان جاعدايدا، تەز ارادا قىزمەت ەتۋ ءۇشىن   قازىرگى تاڭدا 25 مامان ارنايى وقىتىلدى»، - دەدى ماڭعىستاۋ وبلىستىق توتەنشە جاعدايلار دەپارتامەنتىنىڭ باستىعى قۋانار بازاربايەۆ.

مامانداردىڭ ايتۋىنشا، بۇگىندە بەلەڭ الىپ تۇرعان اۆتوكولىكتەردەگى ءورت وقيعالارىن  بولدىرماۋ ماقساتىندا جەرگىلىكتى پوليسيا قىزمەتى وكىلدەرىمەن بىرىگىپ، قالالىق جانە اۋداندىق بولىمشەلەرمەن رەيد وتكىزىلىپ، جۇرگىزۋشىلەرگە   1000 اسا جادىناما تاراتىلعان.  قوعامدىق ورىنداردا جانە ادامدار كوپ شوعىرلاناتىن جەرلەردە  ءورت قاۋىپسىزدىك تالاپتارىن تۇسىندىرەتىن 6 بيلبورد ورناتىلعان.