«قازاقستان تەمىر جولى» زاماناۋي تەحنولوگيامەن قۇراستىرىلعان جاڭا پلاسكارت ۆاگونداردى «الماتى-ماڭعىستاۋ» باعىتىندا جۇرەتىن پويىزدارعا قوستى. شىلدەنىڭ 22-جۇلدىزىندا الاتاۋ بوكتەرىنەن بەت العان جۇردەك پويىز بۇگىن ماڭعىستاۋعا كەلىپ توقتادى. 54 جاتىن ورنى بار جاڭا ۆاگونداردا تۇرعىنداردىڭ جايلىلىعىمەن قوسا قاۋىپسىزدىگى ءۇشىن دە قولايلى جاعى قاراستىرىلعان. اتاپ ايتقاندا، سالقىنداتقىش، اۋا تازارتاتىن سۇزگى، توڭازىتقىش  سونداي-اق ءورت ءسوندىرۋ قۇرالدارىمەن جابدىقتالعان. سونىمەن قاتار، كەيىنگى ۇلگىدەگى باقىلاۋ كامەرالارى، ەكى بيو اجەتحانا، ۇيالى تەلەفون قۋاتتاعىشتار مەن تازا سۋلار دا  قول جەتىمدى. بۇرىن توزىعى جەتكەن ۆاگوندارمەن جول ءجۇرۋ ءبىراز قيىندىق تۋدىرعان بولسا، بۇگىندە تۇرعىندار جاڭالىقتى ەستىپ قۋانۋدا.

«الماتى-ماڭعىستاۋ باعىتىندا جۇرەتىن پويىزدارعا ازىرگە 25 جاڭا پلاسكارت ۆاگون ءبولىندى.  بۇگىن كەلگەن №377-378  پويىزىنا 9 پلاسكارت ۆاگون تىركەلسە، وسى باعىتتاعى تاعى ەكى قۇرامعا 8 ۆاگون جالعانادى. حالىقتىڭ كوڭىلىنەن شىعۋدا. بۇرىن پويىز توقتاعان  ستانسيالاردا اجەتحانالار جابىلىپ، جولاۋشىلارعا ىڭعايسىزدىق تۋعىزسا، جاڭا ۆاگونداردا بارلىعى اۆتوماتتاندىرىلعان. كۇن قانشا ىستىق بولسا دا، سالقىنداتقىش ارقىلى ءبىر تەمپەراتۋرانى قويىپ جايلىلىق ورناتۋعا مۇمكىندىك بار»، - دەيدى ۆاگون جولسەرىگى ايبولات جايلاۋباي ۇلى.

الەۋمەتتىك ماڭىزى بار باعىت بولعان سوڭ ارنايى «الماتى-ماڭعىستاۋ» پويىزىنا تىركەلگەن ۆاگوندار، رەسەي تەحنولوگياسىمەن وتاندىق «تۇلپار تالگو» زاۋىتىندا قۇراستىرىلعان. مامانداردىڭ ايتۋىنشا، جاڭا ۆاگونداردىڭ ءبىر ەرەكشەلىگى قىس مەزگىلىندە ۆاگون ىشىندە جىلىتۋ جۇمىستارى ءۇشىن جاعداي قولايلى. جىلۋ تاراتاتىن قۇرىلعى ىشىنە بۇرىنعىداي سۋ ەمەس، توسول قۇيىلادى، ول جوعارى تەمپەراتۋرا كەزىندە قاتىپ قالمايدى ەكەن. الداعى ۋاقىتتا بارلىق ۆاگوندار وسىلاي جاڭارتىلادى دەگەن جوسپار بار.