اقتاۋدا حالىقارالىق دارەجەدە دزيۋدودان ەرلەر جانە ايەلدەر اراسىندا اشىق ازيا كۋبوگى باستالدى.  ماڭعىستاۋدىڭ قۇرمەتتى ازاماتى تۇرار جولدىبايەۆتى ەسكە الۋعا ارنالعان جارىس حالىقارالىق دزيۋدو فەدەراسياسىنىڭ كۇنتىزبەسىنە سايكەس ۇيىمداستىرىلىپ كەلەدى. بيىلعى تۋرنيرگە 11 ەلدەن 200-دەن اسا سپورتشى كەلدى.

تۇرار جولدىبايەۆتى ەسكە الۋعا ارنالعان دزيۋدو جارىسى ايماقتا ءحى رەت باستالدى. ماڭعىستاۋداعى ىرگەلى جارىستىڭ اشىلۋىنا قاتىسقان ءوڭىر باسشىسىنىڭ ورىنباسارى قانىبەك جۇماشيەۆ باسەكە ۇيىمداستىرۋشىلارىنا العىس ايتىپ، قاتىسۋشىلارعا ساتتىلىك تىلەدى.

ماڭعىستاۋ وبلىسىندا دزيۋدو سپورتىنىڭ دامۋىنا قوسقان ۇلەسى ءۇشىن قازاقستان دزيۋدو فەدەراسياسىنىڭ پرەزيدەنتى وبلىس باسشىسى سەرىكباي ترۇموۆقا العىس جاريالادى.

بيىلعى باسەكەگە قازاقستان قۇراماسىمەن قاتار گونكونگ، وڭتۇستىك كورەيا، يسپانيا، رەسەي، تاجىكستان، وزبەكستان، موڭعوليا، قىرعىزستان ەلدەرىنەن كەلگەن 200-دەن اسا سپورتشى اقتاۋ تاتاميندە ونەر كورسەتتى. جارىس جەڭىمپازدارىنا الەمدىك رەيتينگتە ۇپايلار قوسىلماق.

جارىستىڭ العاشقى كۇنى ايەلدەر 48 كگ، -52 كگ، -57 كگ دا جەڭىمپازداردى انىقتاسا،  60 كگ، - 66 كگ،  73 كگ-دا  جەڭىمپاز ەرلەردىڭ ەسىمى بەلگەلى بولدى. 60 كەلىدە جۇلدە العاندار قاتارىندا ماڭعىستاۋلىق باۋىرجان ناربايەۆ تا بار. قازاقستان ۇلتتىق قۇراماسىنىڭ مۇشەسى ازيا كۋبوگى جولىنداعى باسەكەدە قولا جۇلدەگە قول جەتكىزدى.

دزيۋدو باسەكەسى ەرتەڭ دە جالعاسادى. ەرتەڭ تاتاميگە ايەلدەر: - 70 كگ، - 78 كگ، + 78 كگ -دا، ەرلەر: - 81 كگ، - 90 كگ،  - 100 كگ، + 100 كگ شىعادى. جارىس جەڭىمپازدارىنا الەمدىك رەيتينگتە ۇپايلار قوسىلماق. اتاپ ايتقاندا  1-ورىن العان سپورتشىعا 100 ۇپاي، 2-ورىن العانعا 60 ۇپايدان بەرىلەدى. ال 3-ورىندى يەلەنگەن دزيۋدوشىعا 40 ۇپاي قوسىلادى.