سودان كەيىن، پرەمەر-مينيستر الاشتىڭ ارداقتى ۇلى، اسا كورنەكتى قالامگەر ءابىش كەكىلباي ۇلىنىڭ قۇرمەتىنە ارناپ سالىنىپ جاتقان رۋحاني ورتالىقتا بولدى. جازۋشىنىڭ مادەني قۇندىلىقتارى مەن ەڭبەكتەرىن ماڭگى ەستە ساقتاۋ جانە ناسيحاتتاۋ ماقساتىندا قۇرىلعان ورتالىقتىڭ اۋماعى 10 گەكتاردى قۇرايدى. وسى جىلدىڭ قازان ايىندا رۋحاني ورتالىقتا ورنالاساتىن مۇراجايدىڭ قۇرىلىسىن تولىق اياقتاۋ، ال كەلەر جىلى نىساندى پايدالانۋعا بەرۋ جوسپارلانىپ وتىر.

سونىمەن قاتار، جۇمىس ساپارى بارىسىندا ۇكىمەت باسشىسى «شليۋمبەرجە»، «كاسپيي بيتۋم»، «كاسپيي» سۋ تۇششىتۋ زاۋىتى سەكىلدى شاھارداعى بىرنەشە ءىرى كاسىپورىنداردى ارالادى. مۇناي ءوندىرۋشى كاسىپورىندارعا قىزمەت كورسەتەتىن «شليۋمبەرجە» كومپانياسىنىڭ وندىرىستىك قۋاتى جىلىنا 1000 ناسوس قوندىرعىسىن شىعارادى. ال، «كاسپيي بيتۋم» زاۋىتى جىلىنا 1 ميلليون توننا مۇناي وڭدەپ، وسى جىلدىڭ وزىندە 151 مىڭ توننادان استام ساپالى جول بيتۋمىن شىعارعان. وسىدان كەيىن اسقار مامين اقتاۋ قالاسىنداعى وندىرىستىك ايماق پەن قاراقيا، مۇنايلى اۋداندارىن اۋىز سۋىمەن قامتاماسىز ەتىپ وتىرعان «كاسپيي» سۋ تۇششىتۋ زاۋىتىندا بولدى. جوبالىق قۋاتى تاۋلىگىنە 25 000 تەكشە مەتر سۋ شىعارادى.

سونداي-اق، ۇكىمەت باسشىسى كاسپيي جاعالاۋىندا ورنالاسقان ەلىمىزدەگى ەڭ ءىرى كۋرورتتىق كەشەننىڭ قۇرىلىسىمەن تانىستى. اقتاۋدان 20 شاقىرىم جەردە 160 گەكتار اۋماقتى الاتىن  دەمالىس ايماعى 2020 جىلى پايدالانۋعا بەرىلەدى دەپ جوسپارلانىپ وتىر.