وسى كۇندەرى قازاقستان رەسپۋبليكاسى قارۋلى كۇشتەرىنىڭ بارلاۋشى اسكەري قىزمەتشىلەرى «اسكەري بارلاۋ ۇزدىكتەرى» سايىسىنا سوڭعى جاتتىعۋلارىن وتكىزدى. اتالمىش سايىس حالىقارالىق ارمي 2019 ارميالىق ويىنداردىڭ باعدارلاماسىنا ەنگەن. سايىسقا ىرىكتەۋ ەتاپتارى بارىسىندا قۇرلىق اسكەرلەرى اسكەري بولىمدەرىنىڭ اراسىندا ۇزدىك بارلاۋشىلار ىرىكتەلىپ الىندى. بارلىعى 30 اسكەري قىزمەتشى. كوماندا قۇرامىنا توپ كومانديرى، اعا بارلاۋشى، ساپەر، مەرگەن، سانيتار، وقشاشارشى، اتقىش، گراناتااتقىش، بايلانىسشى، سونداي-اق رەزەرۆتەگى 2 اسكەري قىزمەتشى مەن تەحنيكالىق پەرسونال كىرەدى. 

سايىس بارىسىندا بارلاۋشىلارعا 5 شاقىرىمدىق جۇگىرۋ ورىنداۋعا، «بارلاۋشىنىڭ سوقپاق جولى» كەدەرگىلەر كەشەنىنەن وتۋگە، ءجاجم جۇرگىزۋ ماشىقتارىن پاش ەتۋگە جانە ءارتۇرلى كىرىسپە مىندەتتەردى پىسىقتاۋعا، ونىڭ ىشىندە، شارتتى قارسىلاسقا تورۋىل ۇيىمداستىرۋعا تۋرا كەلەدى.

كونكۋرس تالاپتارىنا سايكەس، بارلاۋشىلار بارلىق كەدەرگىلەردى تولىق كيىم-كەشەكتە ەڭسەرۋلەرى ءتيىس. ونىڭ سالماعى شامامەن 25 كەلىنى قۇرايدى. بۇل قارۋ-جاراق، مينا-جارىلعىش جانە ينجەنەرلىك قۇرالدار، كيىم جانە مەديسينالىق مۇلىك، سونداي-اق ءبىر تاۋلىكتىك قۇرعاق ازىق.

بيىلعى جىلى «اسكەري بارلاۋ ۇزدىكتەرى» حالىقارالىق بايقاۋى ءۇندىستاننىڭ دجايسالمەر قالاسىندا وتەدى، ول ولكەدەگى سايىسقا ءشولدى جەردەگى تۇنگى بارلاۋ ەتاپىن قوسۋ ماسەلەسى دە قاراستىرىلۋدا. كەزەكتى V «ارمي-2019» حالىقارالىق ارميا ويىندارى 2019 جىلدىڭ 3-17 تامىز كۇندەرى وتەدى دەپ جوسپارلانعان. بيىل ويىندار 10 مەملەكەتتىڭ اۋماعىنا وتەدى، ولار: ءازىربايدجان، ارمەنيا، بەلارۋس، يران، ينديي، قازاقستان، جۇڭگو، مونعوليا، رەسەي جانە وزبەكستان.