كوميتەت ارنايى جاساق تەك رەزەڭكە وقتارمەن قارۋلانعانىن، وپەراسيا جالعاسىپ جاتقانىن مالىمدەدى.
7 شىلدە بىشكەك ۋاقىتى بويىنشا كەشكى سەگىز شاماسىندا كوي-تاشتاعى اتامبايەۆ ۇيىنە ارنايى جاساق كەلگەنى بەلگىلى بولدى. اتامبايەۆتىڭ جاقتاسى ميربەك ايتيكەيەۆ الەۋمەتتىك جەلىدە تىكەلەي ترانسلياسيا تاراتتى. ۆيدەودا اتامبايەۆ ءۇيىنىڭ ماڭىندا ماسكا جانە ارنايى جاساقتىڭ فورماسىن كيگەن قارۋلى ادامدار كورىندى. ۆيدەودان مىلتىقتىڭ داۋىسى دا ەستىلدى.
ازاتتىقتىڭ قىرعىز قىزمەتى كەم دەگەندە 15 ادامنىڭ جارالانعانىن، ءبىرازىن اۋرۋحاناعا الىپ كەتكەنىن حابارلادى. جارالانعانداردىڭ اراسىندا 24.kg سايتىنىڭ ءتىلشىسى ايدا جۋماشيەۆا دا بار. ونىڭ اياعىنا رەزەڭكە وق تيگەن. ەلدىڭ دەنساۋلىق مينيسترلىگى كوي-تاشقا 8 جەدەل جاردەم بريگاداسى جىبەرىلگەنىن مالىمدەدى.
ازاتتىقتىڭ قىرعىز قىزمەتىنىڭ تىلشىلەرى كوي-تاش ايماعىندا ۇيالى بايلانىس ناشارلاعانىن، اۋىلعا كىرەبەرىستە پوليسەيلەر تۇرعانىن حابارلادى. اتامبايەۆتىڭ جاقتاستارى كوي-تاشقا كىرەر جولداعى اعاشتاردى قۇلاتا باستاعانى دا ايتىلدى.
ءدال قازىرگى وقيعا قالاي بولىپ جاتىر؟
♦وقي وتىرىڭىز: اتامبايەۆتىڭ اينالاسىنداعى داۋ-داماي قالاي بولىپ جاتىر؟(ۆيدەو)
