قىتايدا ۇستالعان اقجارقىن تۇرلىبايدىڭ اناسى زۋحرا سەيتىموۆا قازاقستان پرەزيدەنتى قاسىم-جومارت توقايەۆتان كومەك سۇرادى. ايەل سوڭعى بىرنەشە جىلدا قىزىمەن العاش رەت 3 قىركۇيەكتە گۋانچجوۋدا كەزدەسكەن دەپ جازادى Qamshy.kz اقپارات اگەنتتىگى tengrinews.kz سايتىنىڭ دەرەگىن نەگىزگە الىپ. سوت قىزى مەن اناسىنا 15 مينۋت سويلەسۋگە رۇقسات بەرگەن.
اقجارقىن تۇرلىباي ءالى كۇنگە دەيىن ەسىرتكى تاسىمالىنا ەش قاتىسى جوق ەكەنىن ايتادى. ول سوڭعى التى جىل ۋاقىتىن جۇڭگو تۇرمەسىندە وتكىزدى. 2015 جىلى ماۋسىمدا قىتايلىق سوت ونى ءومىر بويىنا باس بوستاندىعىنان ايىرعان ەدى. الايدا 2016 جىلى سوت ۇكىمىنىڭ كۇشى جويىلىپ، ءىستى قايتا قاراۋعا جىبەردى.
"اسا قۇرمەتتى پرەزيدەنت مىرزا - قاسىم-جومارت توقايەۆ! 2014 جىلى ناۋرىز ايىنان باستاپ مەنىڭ قىزىم اقجارقىن تۇرلىباي جۇڭگو ەلىندە ەسىرتكى كونترابانداسىمەن تاسىمالدادى دەگەن كۇدىكپەن ۇستالدى. بەس جىلدان اسا ۋاقىتتان بەرى مەنىڭ قىزىمنىڭ ۇستىنەن سوت ءجۇرىپ جاتىر. سودان بەرى، ءومىر بويىنا باس بوستاندىعىنان ايىرىلسىن دەگەن ۇكىم شىعارىلدى. ودان كەيىن ونىڭ كۇشى جويىلدى. ءقازىر تەرگەۋ ءجۇرىپ جاتىر.
مەنىڭ قىزىمنىڭ تاراپىنان جۇڭگو جاعىنان دا قازاقستان جاعىنان دا ادۆوكاتتار تەگىن قىزمەت كورسەتىپ جاتىر. ولارعا مەنىڭ العىسىم شەكسىز. 2015 جىلى ساريكس ۇيىمى مەنىڭ قىزىمدى، اقجارقىن تۇرلىبايدى نيگەريالىق ەسىرتكى مافيالارىنىڭ قۇربانى بولعانى تۋرالى مالىمدەمە جاسادى. الايدا قازاقستان ىشكى ىستەر مينيسترلىگى قاجەتتى مالىمدەمە بەرمەي وتىر. سوعان قاراي، بىزگە جۇمىس ىستەمەي جاتىر.
ق ر كونستيتۋسياسىنىڭ 11-بابى 2-بولىگى بويىنشا، ەلىمىزدىڭ ازاماتتارى شەتەلدە بولعاندا ولاردىڭ قۇقىعى قورعالادى دەلىنگەن. بۇل سىزگە تانىس جاعداي دەپ بىلەم. سىزدەن ءوتىنىپ سۇرارىمىز، وسى مەنىڭ قىزىمنىڭ، ول جاقتان شىعۋىنا كومەك بەرسەڭىز. سىزدەن جالىنىپ سۇرانامىز. مەن، مەنىڭ وتباسىم، اكەسى، باۋىرلارى سىزدەن سۇرايتىنىمىز - مەنىڭ قىزىما كومەكتەسىڭىزشى. قىزىمنىڭ جازىعى جوق ەكەنى كەشەگى بارعان سوتىندا دالەلدەر كەلتىرىلدى. ءبىراق ولار بىزدەن سۇراعان قاعازدى بەرە الماعاندىقتان، اشىق سوتتىڭ شەشىمى شىعارىلعان جوق. سوعان دەيىن، ءسىز بىزگە كومەكتەسسەڭىز ەكەن. راقمەت سىزگە!"، -دەيدى اقجارقىن تۇرلىبايدىڭ اناسى.
پىكىر قالدىرۋ