بانك الدىنداعى بەرەشەگى قىسقارعاندار اراسىندا الەۋمەتتىك حال-احۋالى تومەن ازاماتتارمەن قاتار كرەديتتى ءوزى جابۋعا قاۋقارلى قالتاسى قالىڭ بيزنەسمەندەردىڭ دە بولۋى بۇقارانىڭ ءبىراز اشۋىن تۋدىرۋدا.

كرەديتى كەشىرىلگەندەردىڭ ءبىرى "اتامەكەن" ۇلتتىق كاسىپكەرلەر پالاتاسى ءتوراعاسىنىڭ ورىنباسارى ولجاس وردابايەۆ. ونىڭ سمارتفون ءۇشىن العان 115 مىڭ تەڭگەسى جابىلعان. الايدا كاسىپكەر بۇل تۋرالى ەشكىمنەن سۇراماعىن ايتۋدا. مەملەكەت اۋدارعان 115 مىڭ تەڭگەنى قايتارىپ بەرمەك بولعان وعان ونىڭ مۇمكىن ەمەستىگىن ايتقان. كاسىپكەر ەندى ول قاراجاتتى قايىرىمدىلىققا جۇمساماق نيەتتە. ولجاس وردابايەۆتىڭ نەسيەسى Kaspi بانكىندە بولىپتى.

اتالعان قارجىلىق ۇيىم تۇرعىنداردىڭ قارىز جۇكتەمەسىن جەڭىلدەتۋ شارالارى ماۋسىم ايىندا جاريالانعان تارتىپكە ساي جۇرگەنىن ءمالىم ەتتى. بورىشكەردىڭ بەرەشەگىن وتەۋ ءۇشىن پروبلەمالىق نەسيەلەر قورى ازاماتتارعا كرەديت بەرگەن ءاربىر بانك پەن شاعىن قارجى ۇيىمدارىمەن كەلىسىمگە وتىرعان. ياعني كرەديتتى كەشىرۋ شارالارى ۇكىمەت بەكىتكەن جوسپارعا ساي ارنايى ءتارتىپ بويىنشا جۇزەگە اسقان.

ەسكەرتە كەتەلىك، بانكتىك امنيستياعا ەنگەن ازاماتتار التى كاتەگوريا بويىنشا تاڭدالعان:

- كوپبالالى وتباسىلار (18 جاسقا دەيىنگى 4 جانە ودان دا كوپ بالاسى بارلار)؛

- اسىراۋشىسىنان ايىرىلعانى ءۇشىن وتەماقى الاتىندار؛

- مۇگەدەك بالالارى بار وتباسىلار، بالا كۇننەن مۇگەدەكتەگى بار 18 جاستان اسقاندار؛

- مەملەكەتتىك الەۋمەتتىك كومەك الاتىندار؛                                                           

- جەتىم بالالار؛

- اتا-انا قامقورلىعىنسىز قالعان بالالار، اتا-اناسىنان كاملەتكە دەيىن ايىرىلعان 29 جاسقا دەيىنگى ازاماتتار؛

وسى اتالعان ساناتقا ەنەتىن قازاقستان ازاماتتارى الەۋمەتتىك جاعدايىنا قاراماستان كرەديتتى كەشىرۋ اكسياسىنا اۆتوماتتى تۇردە قاتىسقان بولىپ تۇر. ۇلتتىق كاسىپكەرلەر پالاتاسى ءتوراعاسىنىڭ ورىنباسارى سولاردىڭ ءبىرى. 

الايدا ەسكەرە كەتەرلىك جايت، جوعارىداعى كاتەگورياعا كىرەتىن تۇرعالاردىڭ ىشىندە 1 ماۋسىمنان كەيىن نەسيە العاندار، جالپى قارىزى 3 ملن. تەڭگەدەن اساتىندار، قارىزدارى كوللەكتورلىق ۇيىمدارعا ءوتىپ كەتكەندەر نەسيەلىك امنيستياعا ىلىنبەيدى. كوپتەگەن تۇسىنىسپەۋشىلىكتەر وسى تالاپتاردى بىلمەگەننىڭ سالدارىنان تۋىپ جاتىر.