بيىل قازاقستاندا بيداي بىتىك شىقپاعان. شىلدەنىڭ ىستىعىندا ءبىرقاتار ەگىس القاپتارى كۇيىپ كەتكەن. قۇرعاقشىلىقتان قوستانايدىڭ 8 اۋدانىنىڭ القاپتارى قاتتى زارداپ شەكتى، دەپ جازادى Qamshy.kz اقپارات اگەنتتىگى informبيۋرو سايتىنىڭ مالىمەتىنە سۇيەنىپ.

جوسپار بويىنشا 20 ملن توننا استىق جينالادى دەپ كۇتىلگەن. ەگىلگەن بارلىق داقىلداردىڭ كولەمى 22،2 ملن گەكتاردى قۇرادى. ونىڭ ىشىندە بيداي 6 ملن گەكتار اۋماققا سەبىلدى. ازىرگە جينالعان ءونىم كولەمى – 9،2 ملن توننا. 

بيدايدىڭ ونىمدىلىگى ورتاشا ەسەپپەن گەكتارىنا 4-5 سەنتنەردەن اسپاپتى. بۇدان بولەك كوپتەگەن ەگىستىك جەرلەرىنىڭ توپىراعى قۇنارسىزدانىپ كەتكەن.

ەندى قازاقستاندىقتاردى ءداندى-داقىل جانە ۇن ونىمدەرىمەن قامتۋ ءۇشىن ۇكىمەت سولتۇستىك قازاقستان، اقمولا جانە قوستاناي وبلىستارىندا جينالاتىن استىققا ءۇمىت ارتىپ وتىر. بۇل تۋرالى 20 قىركۇيەكتە الماتىدا وتكەن ق ر پارلامەنتى سەناتىنىڭ كوشپەلى وتىرىسىندا ءمالىم بولدى.

– بيىل وتە قيىن بولدى. ەگىن ەگۋ جانە تىڭايتۋ جۇمىستارىن دەر كەزىندە باستادىق. ءبىراق ەگىن جوسپارداعىداي شىقپادى. جىلداعىدان 3 ەسە كوپ ءونىم الامىز دەپ ويلادىق. الايدا بىلتىرعىمەن سالىستىرعاندا استىق كولەمى 15 پايىزعا از شىقتى. كۇننىڭ ىستىعى قاتتى اسەر ەتتى. ءقازىر سولتۇستىك وڭىرلەردە جاڭبىر جاۋىپ، جيىن-تەرىمگە كەدەرگى كەلتىرىپ جاتىر. استىقتى سۋداي جيناپ جاتىرمىز، ارينە بۇل دا ساپاعا اسەر ەتەدى. دەگەنمەن، قانشا ءونىم العانىمىزدى قامباعا قۇيعاندا ناقتى ايتامىز، – دەدى ق ر اۋىل شارۋاشىلىعى ءبىرىنشى ۆيسە-مينيسترى ايداربەك ساپاروۆ.