دارىگەرلەردىڭ قاتەلىگىنەن جاڭا تۋعان ءسابي قايتىس بولعان اتىراۋ وبلىستىق پەريناتالدىق ورتالىقتىڭ دارىگەرلەرى مالىمدەمە جاسادى دەپ جازادى Qamshy.kz اقپارات اگەنتتىگى "حابار 24" تەلەارناسىنىڭ دەرەگىن نەگىزگە الىپ. اتالمىش ورتالىقتىڭ 31 دارىگەرى جۇمىستان كەتۋ تۋرالى ارىز جازىپتى. ولار تەرگەۋ اياقتالعانعا دەيىن دۇرىستاپ جۇمىس ىستەۋگە مۇمكىندىك بەرۋىن سۇراپ وتىر.
"ولاردىڭ كىنالى نە كىناسىز ەكەنىن بىلمەيمىن. سوت شەشىمى شىقپاي جاتىپ ەشكىم ەشتەڭە ايتا المايدى. بىزگە جۇمىس ىستەۋگە مۇرشا بەرىڭىزدەرشى!"، - دەدى پەريناتالدىق ورتالىقتىڭ گينەكولوگيالىق ءبولىمىنىڭ مەڭگەرۋشىسى باقىت شوقابايەۆا.
"بىزگە ءدال ءقازىر پسيحولوگيالىق جانە مورالدىق تىنىشتىق كەرەك. ءوز جۇمىس ورنىمىزدا دۇرىس جۇمىس ىستەي الۋىمىز ءۇشىن"، - دەيدى اكۋشەر-گينەكولوگ مەرۋەرت ايدارحانوۆا.
ال اكۋشەر گينەكولوگ مۇنداي جاعدايدا جۇمىس ىستەۋ مۇمكىن ەمەس ەكەنىن ايتتى.
"حالىق اراسىندا مۇندا تەك قانىشەرلەر جۇمىس ىستەيدى دەگەن وي قالىپتاسقان. مۇنداي جاعدايدا جۇمىس ىستەۋ مۇمكىن ەمەس. ونسىز دا بۇل جاعدايدان سوڭ وڭاي ەمەس"، - دەيدى اكۋشەر-گينەكولوگ نۇرلان جۇبانىشيەۆ.
ەسكە سالا كەتسەك، وسى ۋاقىتقا دەيىن پەريناتالدىق ورتالىقتىڭ ديرەكتورى قۋانىش نىسانبايەۆ پەن اكۋشەر-گينەكولوگ اسقار قايىرجانعا شاقالاقتى ادەيى ءولتىردى دەگەن ايىپ تاعىلعان. تەرگەۋ مالىمەتى بويىنشا، دۇنيەگە كەلگەن ءسابيدى "ءولى تۋدى" دەپ راسىمدەپ، مۇزداتقىش كامەراسىنا سالىپ تاستاعان. ال ءسابي ول كەزدە ءتىرى بولعان.
تەرگەۋ ەندى باستالعان ءىس كوپشىلىكتىڭ نارازىلىعىن تۋدىردى. وقيعا اۋرۋحانانىڭ جۇمىسىن توقتاتتى. ورتالىققا ەڭ قاجەت دەگەن ماماندار جۇمىستان كەتۋ تۋرالى ارىز جازعان.
"ءقازىر جەرگىلىكتى بيلىك دارىگەرلەرمەن ديالوگ ورناتۋ ءۇشىن بارىن سالۋدا. «قازىرگى ۋاقىتتا دەنساۋلىق ساقتاۋ باسقارماسى، مينيسترلىك پەن كاسىپوداق ۇيىمدارىنىڭ وكىلدەرى ولارمەن جۇمىس ىستەۋدە. ولاردىڭ ءارقايسىسى كۇن سايىن ادام ءومىرى ءۇشىن كۇرەسەتىن ەڭ قاجەت ماماندار"، - دەدى اتىراۋ وبلىسى اكىمىنىڭ باسپا ءسوز حاتشىسى سەرىكجان ەرمەنتايەۆ.
"مەديسينالىق كومەكتى بەرە بەرۋىمىز كەرەك. سوندىقتان ءوز دارىگەرلەرىمدى بۇگىن ودان دا جاقسى، بۇرىنعىداي جۇمىس ىستەۋگە شاقىرامىن"، - دەدى وبلىستىق دەنساۋلىق ساقتاۋ باسقارماسىنىڭ باسشىسى مانشۇك ايمۇرزييەۆا.
پىكىر قالدىرۋ