قازاقستاننىڭ قورعانىس ءمينيسترى نۇرلان ەرمەكبايەۆ ارىس قالاسىن وق-دارىدەن تازارتۋ جۇمىستارىنىڭ جۇرگىزىلۋ بارىسى مەن اسكەري قىزمەتشىلەردىڭ اتقارىپ جاتقان قىزمەتى تۋرالى اقپارات بەردى، دەپ حابارلايدى Qamshy.kz اقپارات اگەنتتىگى.
ءمينيستردىڭ مالىمەتىنشە، ارىس قالاسىنداعى جاعدايدى رەتتەۋ ءۇشىن 700-دەن استام ادام تارتىلعان. ەرمەكبايەۆ ارىس ماڭىندا قانشا ءوق-دارى قالعانىن ايتۋعا قۇقى جوق ەكەنىن اتاپ ءوتتى.
- ءبىز ءقازىر جوعارى باس قولباسشىنىڭ تاپسىرماسىن ورىنداپ ءجۇرمىز. قالعان ءوق-دارىنى تەزىرەك شىعارۋدى تالاپ ەتىپ وتىرعان ارىستىقتاردىڭ تالابى، مەملەكەتتىك قاجەتتىلىك بار. ءبىز ونداعى جۇمىستارعا اسكەرگە شاقىرىلعانداردى جۇمىلدىرمايمىز. تەك بىلىكتىلىگى جوعارى، دايارلانعان ساپەرلەر مەن ينجەنەرلەر، اسكەري پوليسەيلەردى تارتامىز. بارلىعى دا كەلىسىمشارت بويىنشا قىزمەت ەتەتىندەر، - دەدى ەرمەكبايەۆ ۇكىمەت كۋلۋارىندا.
ەرمەكبايەۆتىڭ ايتۋىنشا، "ارىس قالاسىنىڭ تۇرعىندارىنا ءقاۋىپ ءتونىپ تۇرعان جوق".
- اسكەريلەر بارلىق جەردە جۇمىس ىستەپ جاتىر. الايدا ءقازىر قالا تۇرعىندارىنا تىكەلەي ءقاۋىپ ءتونىپ تۇرعان جوق. قالانىڭ بارلىق دەرلىك اۋماعى تازارتىلعان. نەگىزگى جۇمىستار جارىلىس بولعان اسكەري ءبولىمنىڭ اۋماعىندا جۇرگىزىلىپ جاتىر. جۇمىس ءقاۋىپتى، - دەدى مينيستر.
اسكەريلەردەن باسقا بۇل مىندەتتى ەشكىم ورىنداي المايدى. بۇل ءۇشىن بىلىكتىلىگى جوعارى، دايىندالعان كاسىبي ماماندار قاجەت. ولار قيىن جاعدايدا جۇمىس ىستەپ جاتىر. ولاردىڭ ومىرلەرى ءۇشىن قاۋىپ-قاتەر بار، - دەدى ەرمەكبايەۆ.
مينيستر قازاقستاندىقتاردى اسكەريلەرگە مورالدىق تۇرعىدان قولداۋ كورسەتۋگە شاقىردى.
پىكىر قالدىرۋ