جالعىزدىق... بۇل، ءبىر - كۇردەلى كاتەگوريا. دەسەك تە، ءتاڭىرى جار بولسا، تاياۋ ۋاقىتتا باسپا بەتىن كورەتىن "اڭقىل" اتتى كوپتومدىق كىتابىمىزدىڭ وسى تاقىرىپ جونىندەگى تولعامدارىنان قىسقا دا نۇسقا بىر-ەكى ءسوزدى كوپكە جاريا ەتەلىك.
"جالعىزدىق" دەگەن ۇعىم بولعانمەن دە، "جالعىزدىق" دەپ اتاۋعا ىلايىق قۇبىلىس مۇلدە جوق. دۋاليزمگە سۇيەنسەك تە - سولاي. ءبىراق، ونى دا اركىم ءار ساققا جۇگىرتۋگە اۋەس. ال، جالپى، شەكسىزدىكتىڭ دە ءبىر سيپاتى - شەكسىز ءوزارا بايلانىس. ءبىز ول جايىندا دا ءار "بىلگىشپەن" داۋلاسىپ جاتپايمىز. ءبىزدىڭ بۇگىنگى پايىمداماعىمىز - ادامعا قاتىستى جالعىزدىق ۇعىمى. دەمەك، سۇراق مىناداي: "ادامعا جالعىزدىق ءتان بە؟". بابالارىمىزدىڭ مىڭداعانجىلدىق دانا دۇنيەتانىمىنا سۇيەنسەك: "ءار ادام - پەرىشتەلى-سايتاندى" ءبىرتۇتاستىق. بەلگىلى ءبىر مولشەردە، "اندروگينيا" دەۋىمىزگە دە بولادى. ول ەكەۋىنىڭ ادامتانۋداعى تەرمينولوگيالىق سانداعان شارتتى اتاۋلارىنىڭ ءبىر جۇبى - "اڭقىر" (قوش ءيىستى ەركەك پەرىشتە،.) مەن "مۇڭكىر" (ساسىق ۇرعاشى پەرىشتە،.)". سول ەكەۋى عۇمىر بويى، "يتجىعىس كۇيدە، ءوزارا كەرىسەدى دە جاتادى". ول ەكەۋىنسىز وي ويلاپ، پىكىر ءتۇيۋدىڭ ءوزى ەش مۇمكىن ەمەس. ءتىپتى، ءار پەندەنىڭ كورەر تۇسىندە دە سولاي. "ءقابىر تالقىسىنداعى تەرگەۋشى ەكى پەرىشتە" دە - "پەندەنىڭ ەكىجۇزدىلىگى" دەگەن ۇعىمنىڭ قالىپتاسۋىنا نەگىز بولعان سول ەكەۋى. اۋىزەكى تىلدە "ناڭكۇر-مۇڭكىر" اتالىپ ءجۇر. "ناڭكۇر" اتاۋىنىڭ ءتۇپنۇسقاسى - "نەاڭقىر" (قوش ءيىسى جوق اڭقىر). 
ءجا، بۇل جەردە ءبىز "جالعىزدىق - قۇدايعا عانا جاراسار" پايىمىن دا ەسكەرمەي كەتە المايمىز. قۇداي "جالعىز" با؟ جوق. ەڭ قۇدىرەتتى اقىل-ەس ىيەسى رەتىندەگى قۇداي دا - "قوس قۇداي ءبىرتۇتاستىعى". قازاق تىلىندە (دۇنيەتانىمىندا) ولاردىڭ كوپتەگەن اتاۋلارىنىڭ ساقتالىپ قالعاندىعى دا سوندىقتان. ءبىر مىسال: "اباي" (باي: "كۇيەۋ قۇداي") جانە "ۇماي" ("ماي" دەپ تە اتالا بەرەدى). سول "ءبىرتۇتاس قوس قۇدايدىڭ" "مۇڭكىرلىگىنىڭ" ءوزى دە قاندايدا ءبىر "قۇدىرەتتى جۇپار ەنە-قۇداي" سيپاتىندا. ول ءوزىنىڭ تۇتاس "زۇلىمدىق" بولمىسىمەن "قۇدىرەتتى اڭقىر اتا-قۇداي" اتالۋعا ىلايىق "قوساعىنا" ماڭگى-باقي ادال دا كەمەل قىزمەت ەتەدى". "قاراما-قارسىلىقتىڭ تاڭ-عاجايىپ جاسامپاز جۇپار گرامونياسى" دەگەنىڭىز - سونداي كەرەمەت. ەگەر، كەز كەلگەن پەندە بالاسىنىڭ "اڭقىرى" مەن "مۇڭكىرى" دە سونداي عاجاپ ءوزارا ۇيلەسىمگە جەتىسكەن بولسا، وندا سول پەندەلەر قوشپەرىشتەلىك رۋحاني كەمەل دەڭگەيگە كوتەرىلگەن بولار ەدى...". 
بابا دۇنيەتانىمعا سۇيەنە، جالعىزدىق تۋرالى ايتپاق بولعان بىر-ەكى ءسوزىمىز - وسىمەن ءتامام. ەندى، وسى تاقىرىپقا وراي، ءبىز ءوزىمىزدى داتتاۋشىلارعا كەزەك بەرەمىز. ايتىپ قالسىن! پەندەلىك "اڭقىر مەن مۇڭكىردىڭ" ءوزارا تالاس-تارتىسى ءالى كوپكە دەيىن سوزىلادى!..

تىنىشتىقبەك ابدىكاكىم ۇلى، facebook