«بۇگىن مەنىڭ قابىلداۋىمدا قالا تۇرعىنى ءبىر ايەل كەلىپ كۇيەۋىنىڭ كۇندە اراق ىشەتىنىن ايتىپ، جاسىرىن تۇردە ساتىلاتىن ارزان اراققا توسقاۋىل قويۋدى سۇرادى. ال، كەشكە ءوزىم قالا ارالاپ ءجۇرىپ مىنانداي ماسقاراعا تاپ بولدىم (ۆيدەو- رەد). اتا - بابام ىشپەگەن اراق - شاراپتى قالاي توقتاتامىز اعايىن، اقىل ايتىڭىزدارشى، جولىن كورسەتىڭىزدەرشى. پوليسيا باستىعى ۇ. سادىقوۆ جانە كىرىستەر باسقارما باسشىسى ق. نۇرعالييەۆ شۇعىل شارا قولدانىڭىزدار». بۇل پىكىر تەكەلى قالاسىنىڭ اكىمى باحتيار ونەربايەۆتىڭ فەيسفۋك پاراقشاسىنان الىندى.
وقيعانى ناقتى باياندار بولساق، قالا اكىمى باحتيار ونەربايەۆ كەشكىلىك وتان سوعىسى ارداگەرلەرى ەسكەرتكىشىنىڭ ماڭىندا "تەنتەك سۋ" ءىشىپ وتىرعان ءۇش جىگىتتى كورەدى. ولار اكىمدى كورىپ تۇرا قاشادى. ۆيدەودان «نەعىپ وتىرسىڭدار، مىناۋ سەندەردىڭ ءىشىپ وتىرعاندارىڭ اراق قوي. نەگە اراق ىشەسىڭدەر، بۇل جەردە. ءتۇرىڭدى كورسەت! بەرى كەل، بەرى! انا بوتەلكەنى ال!» دەگەن قالا اكىمىنىڭ داۋسى ەستىلەدى. ال ءۇش جىگىت ءىشىپ وتىرعان اراعىن ستاكاندارىمەن قوسا لاقتىرىپ قاشا جونەلەدى.
ال وقيعا نەمەن اياقتالدى؟ بۇل جەردە پوليسيا وكىلدەرى ىسكە قۇمبىل كىرىسكەن. مۇنان كەيىنگى جاعدايدى ءبىز قالا اكىمى باحتيار ونەربايەۆتىڭ ءوز اۋزىنان ەستىدىك.
–ەرتەڭىنە وتان سوعىسى ارداگەرلەرىنىڭ گۇلزارىندا اراق ءىشىپ وتىرعان ءۇش جاس اكىمشىلىككە كەلىپ، كەشىرىم سۇرادى. انت سۋ ءىشىپ، ەندى اراقتى اۋزىنا تاتىپ المايتىندارىن ايتتى. ايىپ رەتىندە ولار ارداگەرلەرگە ارنالعان ەسكەركىشتەردى جۋىپ، ونىڭ ماڭىن تولىقتاي تازارتۋعا ۋادە بەردى،- دەيدى قالا اكىمى باحتيار ونەربايەۆ.
ءبىزدىڭ بىلگەنىمىزدەي، ءىس سوتقا جولدانعان. ال ارداگەرلەر گۇلزارى مەن ساياباق جانە قالانىڭ كورىكتى جەرلەرى اراق ىشەتىن ورىن ەمەس. مۇنى جاس جىگىتتەر دە تۇسىنگەن بولۋى كەرەك. ءسويتىپ قالا اكىمى «تەنتەك سۋ» ىشكەن تەنتەكتەردى تىيدى، ولاردى قوعامدىق ىسكە تارتتى. ءبىزدىڭ ايتپاعىمىز، بۇعان اكىم عانا ەمەس، قوعام دا قوزعاۋشى كۇش بولۋى قاجەت.
پىكىر قالدىرۋ