قازاقستاندىق كاسىپكەر، قوعام بەلسەندىسى مارعۇلان سەيسەنباي مەملەكەت باسشىسى قاسىم-جومارت توقايەۆتىڭ الماتى قالاسىنا كەلىپ ايتقان ويلارىنا قاتىستى پىكىر ءبىلدىردى دەپ جازادى Qamshy.kz اقپارات اگەنتتىگى Exclusive-كە بەرگەن سۇحباتىنا سۇيەنىپ. 

الدىمەن، كاسىپكەر توقايەۆتىڭ جيىندا ايتقان دۇنيەلەرى جاي عانا پوپۋليستىك نارسە بولىپ قالماسى ءۇشىن ارەكەتكە كوشكەنى ءجون دەگەن ويدى العا تارتادى.

– توقايەۆ وڭتۇستىك استاناعا كەلىپ، ءبىراز ماسەلەلەردى كوتەرىپ، ەلدى تاڭقالدىردى. ونىڭ ايتقان دۇنيەلەرى، مەنىڭ ويىمشا، وتە دۇرىس. ءبىراق ونى جۇزەگە اسىرۋ – ءبىر بولەك. توقايەۆتىڭ پوپۋليست ەمەس ەكەنىن ىسكە كىرىسكەندە عانا بىلەمىز. وعان، شامامەن، جارتى جىلداي ۋاقىت كەتەدى. ەگەر وسى ۋاقىتتىڭ اراسىندا توقايەۆ ايتقان مالىمدەمەسىن ىسكە اينالدىرا الماسا، وندا پوپۋليستىك مالىمدەمە جاساۋشى ادام رەتىندە قالىپ قالۋى مۇمكىن، – دەيدى سەيسەنباي.

الايدا توقايەۆتى ءقازىر پوپۋليست دەۋگە كەلمەيدى. ويتكەنى كوكجايلاۋداعى قۇرىلىستى كوكتەمدە توقتاتۋ تۇرۋ تۋرالى ويىن ايتىپ، كەيىن وسى جولى ونى توقتاتۋعا تولىق بۇيرىق بەردى.

– ياعني، توقايەۆ باتىلدىق تانىتتى. ساياساتكەردىڭ قانداي ادام ەكەنىن تانۋ ءۇشىن 5 نارسەگە ءمان بەرگەن ءجون. ءبىرىنشى – ساياساتكەردىڭ بەلگىلى ءبىر ماسەلەگە قاتىستى ايتقان ويى، ەكىنشىسى – ونىڭ وسى ماسەلەگە قاتىستى شەشىمى بولسا، ءۇشىنشىسى – ىس-ارەكەتى، ءتورتىنشىسى – جاساعان ىس-ارەكەتىنىڭ ناتيجەسى، بەسىنشىسى – شىققان ناتيجەگە كىم جاۋاپ بەرمەك، سونى انىقتاۋ. مىنە، توقايەۆ وسى بەس كەزەڭنىڭ ەكەۋىن ءوتىپ، ۇشىنشىسىنە اياق باستى. توقايەۆ وسى جولى الماتىعا كەلىپ بۇيرىق بەرىپ، شەشىم شىعاردى. مۇنى ول ەركەكشە ايتتى. سونىسى ۇنادى، – دەيدى كاسىپكەر.

ەندى ءىس قالدى. وسى ورايدا سەيسەنباي ءبىر قىزىق جايتتى ايتا كەتەدى. ونىڭ ويىنشا، ەگەر توقايەۆ بۇل شەشىمدى ورىنداي الماسا، حالىق كىنانى توقايەۆتان ەمەس، «جوعارعى جاقتان» كورەتىنىن انىق.

– وتكەن قابىلدانعان قاۋلىعا سايكەس، توقايەۆتىڭ قابىلداعان شەشىمدەردىڭ بارلىعىن «كىتاپحانا» (نازاربايەۆتىڭ كومانداسى) ماقۇلداۋى ءتيىس. ياعني، فاكتىگە سۇيەنسەك، توقايەۆ جاۋاپكەرشىلىكتى سول جاققا بەرىپ جىبەردى. حالىق تا توقايەۆ ۋادەسىن ورىنداي الماسا، وعان «كىتاپحانا» ورىنداتپاي قويدى دەگەن وي پايدا بولادى، – دەيدى سەيسەنباي.