تۇركيا – وڭتۇستىك-باتىس ازيادا 97% جانە 3% ەۋروپادا ورنالاسقان. تۇركيا مەملەكەتى 1923 جىلى وسمان يمپەرياسىنىڭ قۇلاۋىنان كەيىن ورىن تەپتى. ال ەلدەگى ەڭ ۇلكەن قالا  – ستامبۋلدىڭ نەگىزى 667 جىلى قالانعان.

ءبىر جىلدا ەلگە 40 ميلليوننان اسا تۋريست كەلەدى ەكەن. ارينە ساياحاتتاۋشى تۋريست ءۇشىن تۇركيا ەلىندە بارلىق جاعداي جاسالعان جانە وزىندىك ەرەكشەلىكتەرى بار.

تۇركيا ەلىنە جاساعان ساياحاتىمدا ءبىراز قىزىقتى جايتتارعا كۋا بولىپ، حالقىنىڭ ءومىر ءسۇرۋ ءداستۇرى مەن وزىندىك ەرەكشەلىكتەرىمەن تانىستىم.

العاش تۇرىك وتباسىنا قوناق بولىپ بارعان كەزدە بارلىعىمەن ەكى رەتتەن قۇشاقتاسا وتىرىپ، جىلى شىرايمەن قارسى الدى. تۇرىك اسحاناسى دا وزىندىك ەرەكشەلىگىمەن كوزگە تۇسەدى. تاڭعى اس ءىشۋ ءاربىر تۇرعىن ءۇشىن ەرەكشە ماڭىزعا يە. 

قوناققا ءومىر ءسۇرۋ ەرەكشەلىكتەرى مەن ءداستۇرىن كەڭىنەن تانىستىرادى ەكەن. قازاقستان حالقىنا دەگەن ىقىلاستارى دا ەرەكشە. بىزدەگى بولىپ جاتقان بارلىق جاڭالىقتارىمەن تانىسىپ، حاباردار بولىپ وتىراتىندارى جايلى ايتىپ ءوتتى. 

تۇركيانىڭ كەز-كەلگەن تۇرعىنى مىسىقتى ەرەكشە قۇرمەتتەيدى جانە كۇتىم جاساپ تاماقتاندىرادى. ءبىر اپاي: «بۇل ءبىزدىڭ حانزادا مەن حانشايىمىمىز» دەپ ازىلدەگەنى ەسىمدە. بۇرىنعى كەزدە مىسىقتى ءزاۋلىم سارايلاردا ۇستاپ، جوعارى تاپ وكىلدەرىنە سىيعا بەرگەنى بەلگىلى.

تۇرىك حالقىندا شاي ءىشۋ ءداستۇرى كەڭ ەتەك العان. قانداي جەردە بولسىن، قاي ۋاقىتتا بولسىن شاي ىشۋدەن باس تارتا المايسىز. تۇرىكتىڭ كوفەسى دە ەرەكشە بەدەلگە يە. سۇلەيمان سۇلتان كەزىنەن كەلە جاتقان تۇرىك سۋسىندارى – باسقا ەلدەن كەلەتىن تۋريستەر ءۇشىن تانسىق ءبىر ءدام.

تۇرىك حالقى ساۋدا جاساۋمەن جانە قىزمەت كورسەتۋىنىڭ جوعارى ساپاسىمەن بىردەن ىستىق ىقىلاسقا بولەنگەن. ەڭبەكقور حالىقتىڭ تۇرمىس-تىرشىلىگىن سىرتتاي باقىلاعان ادامعا ەرەكشە اسەر قالدىرادى. 

تۇركيا ەلىندە تەمەكى تارتۋ ايتارلىقتاي ەتەك العان ەكەن. كوشەدەگى كەز كەلگەن تۇرعىننان باستاپ تەمەكى تارتۋ ۇيرەنشىكتى كورىنىس كورىنەدى.

ادامدارى ءبىر-بىرىنىڭ ەسىمدەرى ايتقاننان گورى «ابي»، «ابلا» سىندى تىركەستەردى ءجيى قولدانادى. بۇل دا ءبىر قۇرمەت جانە كەڭ ەتەك العان.

تۇركيادا تاريحي جەرلەر، يۋنەسكو-نىڭ قورعاۋىنا الىنعان ەسكەرتكىش ورىندارى ايتارلىقتاي كوپ. ءاربىر ورىنعا كىرۋدىڭ ءوزى قالتاڭىزدى ءبىراز قاعىپ، ۋاقىتىڭىزدى دا الادى. سەبەبى كەزەكتە تۇراتىن حالىقتىڭ سانى كوپ جانە بيلەت قۇنى ارزان ەمەس. الايدا ارنايى Museum card سىندى قوسىمشا جەڭىلدىك سىيلايتىن كارتانىڭ ارقاسىندا اقشاڭىزدى ۇنەمدەۋگە مۇمكىندىك الاسىز. 

اييا سوفيا مۇراجاي عيماراتى. 325 جىلى يمپەراتور كونستانتيننىڭ بۇيرىعى بويىنشا نەگىزى قالانعان. عيماراتتى 10 مىڭ جۇمىسكەر 5 جىلدا سالىپ بىتىرگەن. 

بەلگىلى جازۋشى ورحان پامۋك ستامبۋلدى قۇپيا قالا دەپ ەسەپتەيدى. ءاربىر ەسىك، ءاربىر كوشە، ءاربىر كوپىر وزىندىك ءمان مەن ماعىناعا يە. جازۋشىنىڭ سوزىنشە، تۇركياداعى ەڭ تانىمال جانە قۇپيا مەن سىرعا تولى سۇلتان سارايى – توپكاپى.