قىتايدان قازاقستانعا "شەكارانى زاڭسىز كەسىپ ءوتتى" دەپ ايىپتالعان ەتنيكالىق قازاقتار قاستەر مۇساحان ۇلى مەن مۇراگەر ءالىمۇلىن قىتايعا قايتارىلادى دەپ مالىمدەدى قازاقستان ۇلتتىق قاۋىپسىزدىك كوميتەتى ءتوراعاسىنىڭ ورىنباسارى، شەكارا قىزمەتىنىڭ ديرەكتورى دارحان ءدىلمانوۆ. بۇل تۋرالى Qamshy.kz اقپارات اگەنتتىگى ازاتتىقتىڭ دەرەگىن نەگىزگە الىپ.
"سوت جانە قىلمىستىق جاۋاپكەرشىلىككە تارتۋ شارالارى تۇگەلدەي اياقتالعاننان كەيىن ءبىز بۇل ازاماتتاردى مەيلى جۇڭگو بولسىن، مەيلى باسقا مەملەكەت بولسىن، كەلگەن ەلىنە قايتارامىز. ناقتى بۇل جاعدايدا ءبىز جۇڭگو رەسپۋبليكاسىنا شەكارالىق وكىلدىك قىزمەتى ارقىلى تاپسىرامىز. ءارى قاراي كورشى مەملەكەت ماسەلەمەن ءوزى اينالىسادى" دەدى دارحان ءدىلمانوۆ. ونىڭ سوزىنشە، ەكى ازاماتقا قاتىستى سوت جاقىندا باستالۋى ءتيىس. ءدىلمانوۆ قازاقستاننىڭ زاڭسىز كوشى-قون پروسەسىمەن "قاتاڭ كۇرەسەتىنىن" ايتقان.
مۇساحان ۇلى مەن ءالىم ۇلىنىڭ ادۆوكاتى ءلاززات احاتوۆا ول "ەكەۋى جۇڭگو جاعىنا تاپسىرىلاتىنىن" ايتقان شەكارا قىزمەتىنىڭ ديرەكتورى دارحان دىلمانوۆپەن كەلىسپەيدى.
"جۇڭگو مەن قازاقستان اراسىندا 2006 جىلى 14 جەلتوقساندا جاسالعان كەلىسىمدە مەملەكەتتىك شەكارانى شاتاسىپ، نە اڭداماي بۇزىپ وتكەن ەكى ەل ادامدارى جەتى كۇن ىشىندە قايتارىلادى دەلىنگەن. سوتقا جەتپەي، جەتى كۇن ىشىندە. ال ءبىزدىڭ جاعدايدا ەكى جىگىت شەكارانى قازان ايىندا بۇزىپ وتكەن. ءقازىر جەلتوقسان ايى. ياعني، جەتى كۇن ەمەس، ەكى ايدان اسىپ كەتتى. ودان وزگە، ەكى جىگىتتىڭ ۇستىنەن قىلمىستىق كودەكستىڭ 392-بابىمەن قىلمىستىق ءىس قوزعالدى. ول ءىس تولىق اياقتالماي، سوت شەشىم شىعارماي، قاستەر مەن مۇراگەردى ەشكىم ەشقايدا قوزعاي المايدى" دەپ جازدى ادۆوكات 6 جەلتوقساندا Facebook الەۋمەتتىك جەلىسىندەگى پاراعىنا.
قازان ايىنىڭ باسىندا جۇڭگو قازاقتارى قاستەر مۇساحان ۇلى مەن مۇراگەر ءالىم ۇلىنىڭ قازاقستانعا "شەكارانى زاڭسىز كەسىپ وتكەنى" تۋرالى اقپارات تاراعان. 14 قازاندا الماتىداعى ادام قۇقىعىن قورعاۋ بيۋروسىندا وتكەن باسپا ءسوز ءماسليحاتىندا قاستەر مۇساحان ۇلى شىڭجاڭداعى "ساياسي لاگەردە قاماۋدا بولعانىن"، مۇراگەر ءالىم ۇلى قىتايدا "قىسىم كورگەنىن" ايتقان ەدى. قازان ايىنىڭ ورتاسىندا ۇقك ولاردى "شەكارادان زاڭسىز ءوتتى" دەپ ايىپتاپ، وسكەمەن قالاسىنداعى تەرگەۋ يزولياتورىنا جەتكىزگەن.
پىكىر قالدىرۋ