پاريجدەگى «نورماند تورتتىگىنىڭ» كەزدەسۋىنەن كەيىن «بۇل كەلىسىم قانشالىقتى پايدا بەرەدى»؟ دەگەن اڭگىمە تاعى دا ايتىلا باستادى. رەسمي كييەۆ باقىلاۋدا ۇستاي الماي وتىرعان دونباسس اۋماعىنىڭ شەكارالىق ايماعىنا قابىرعا تۇرعىزۋى مۇمكىن.

–ەگەر ناتيجە شىقپاسا، بۇل ەڭ سوڭعى قادام بولىپ سانالادى، – دەپ مالىمدەدى ۋكراينا پرەزيدەنتى ۆلاديمير زەلەنسكيي  «1+1» تەلەكانالىنا بەرگەن سۇحباتىندا.

–بۇل –  «ب» جوسپارى. بۇل – ەڭ سوڭعى ارەكەت. ءبىراق مەن بۇل جوسپاردىڭ ورىندالۋىن قالامايمىن،– دەدى ۆلاديمير زەلەنسكيي.

ايتا كەتۋ كەرەك، ءقاۋىپسىزدىڭ كەڭەسىنىڭ وتىرىسىندا سوعىس ايماعىنا قاتىستى بىرنەشە جوسپار قارالعان. قازىرگى ۋاقىتتا ۋكراينانىڭ لۋگانسك مەن دونەسك وبلىسىنىڭ ءبىراز بولىگىنە رەسمي كييەۆتىڭ بيلىگى جۇرمەيدى. ءتورت جىلدان بەرى ماسەلە شەشىلگەن جوق. وسىدان ءبىر اپتا بۇرىن «نورماند تورتتىگى» شيەلەنىسكەن  جاعدايدى رەتتەگىسى كەلگەن. ءبىراق اشىعىن ايتساق، "مينسك كەلىسىمىنىڭ" ءوزى قازىرگى پرەزيدەنت زەلەنسكييگە ۇناپ وتىرعان جوق. مينسك كەلىسىمى بويىنشا دونباسس ايماعى، اتاپ ايتقاندا لۋگانسك مەن دونەسك وبلىسىنا  ەرەكشە ستاتۋس بەرىلۋى قاجەت. ءبىراق مۇنىڭ ءوزىن رەسمي كييەۆ جاقتىرا قويمايدى. قالاي ايتقاندا دا، ۋكراينا ەلدىڭ شىعىسىنداعى ەكى وبلىستىڭ ءبىراز بولىگىن قايتارا المايدى. وسىنى تۇسىنگەن بولۋى كەرەك، پاريجدەن ورالا سالىسىمەن زەلەنسكيي قاۋىپسىزدىك كەڭەسىنىڭ جيىنىن وتكىزگەن.

–جاعدايدى بۇلاي قالدىرا بەرۋگە بولمايدى. ءبىراق ماسەلەنىڭ شەشىمىن تابۋ كەرەك. ءالى دە سوعىس. ادامدار ءولىپ جاتىر. سوعىس ايماعى سىزىعىنا جاعالاي قابىرعا تۇرعىزۋ–  ەڭ سوڭعى نۇسقا. ءبىراق بۇلاي ەتكەن جاعدايدا ءبىز دونباسس اۋماعىنان ايرىلامىز. بۇل تىعىرىقتان شىعاتىن جول ەمەس. ەگەر قابىرعا تۇرعىزاتىن بولساق، لۋگانسك مەن دونەسك مۇلدەم باسقا مەملەكەتكە اينالادى. سوندىقتان ەڭ الدىمەنوندا ءومىر ءسۇرىپ جاتقان ادامداردىڭ كوزقاراسىن وزگەرتۋىمىز كەرەك. ولار ۋكرايندىقتان ەكەنىن سەزىندىرۋىمىز كەرەك، –دەدى ۆلاديمير زەلەنسكيي.

... ءبىراق قالاي؟!