بۇل تۋرالى ادەبيەتتانۋشى  تىلەك ىرىسبەك ءوزىنىڭ «فەيسبۋك» جەلىسى پاراقشاسىندا جازدى دەپ حابارلايدى «Qamshy.kz» اقپارات اگەنتىگى.  

مۇنداي توپتى «ادەبي پارازيتتەر» دەپ باعالاعان ادەبيەتتانۋشى ءوزىنىڭ بۇلاي اتاۋىنا ولاردىڭ قوعامداعى بىتەۋ جاراعا اينالىپ بارا جاتقان ءتۇرلى پروسەستەرگە دەگەن نەمكەتتىلىگى سەبەپ بولعانىن ايتادى.

"ەڭ ءقاۋىپتى ادام ول – نەمقۇرايلى ادام. اۆتوريتارلىق بيلىككە قۇرىلعان جۇيە ءتۇپتىڭ تۇبىندە كۇيرەپ تىنارى انىق. وعان رۋحانياتتىڭ دا تيگىزەر اسەرى بولەكشە. فرانسۋز، يسپان، نەمىس، ءتىپتى لاتىن امەريكا ادەبيەتى وعان انىق مىسال. ال، وسى تۇرعىدا ءمۇيىزى قاراعايداي قازاق اقىن-جازۋشىلارى ءۇنسىز جانە ماراپات سۇيگىش. ءتىپتى الەۋمەتتىك جەلىدە اشىق پىكىر بىلدىرۋگە قۇلىق بىلدىرە المايتىن ولاردى قورقاق دەپ تۇسىنۋگە بولماس، ءبىراق، بيلىككە جاعىمپاز دەۋگە تولىق نەگىز بار. وسى تۇرعىدا ولاردى تازابەكتەر مەن بەكبولاتتاردان ەش ايىرماشىلىعى جوق مۇددەلەستەرى جانە جاقتاستارى دەپ باعامدايمىن.  ولاردىڭ كوكەيىن تەسكەن ورتاق مۇددە – اقشا، ماراپات، قىزمەت، ءمۇشايرا ءھام مەملەكەتتىك سىيلىق"، – دەيدى تىلەك ىرىسبەك.

سونىمەن بىرگە، پىكىر يەسى ەكى تاراپقا دا جاعىمدى بولىپ كورىنۋدىڭ امالى وسى  – «ءۇنسىز قالۋ» تاجىريبەسى ەكەنىن ايتادى. سونىڭ ايقىن كورىنىسى  – كەشەگى جاڭاوزەن وقيعاسىنا جاق اشپاۋ، ادىلدىك سۇراپ الاڭعا شىققان ءوز قازاعىن «بۇلىكشى» دەپ ايىپتاۋ، سايلاۋدىڭ ادىلەتتى وتۋ-وتپەۋىنە «تۇكىرۋ»، بۇگىندە بولىپ جاتقان ءتۇرلى ازاماتتىق نارازىلىقتارعا نەمقۇرايلىق تانىتۋ، ەشبىر وزگەرىسكە نيەت ەتپەۋ تاعىسىن تاعىلار دەيدى. 

سونداي-اق، ول اۋدارما ىسىندەگى كوزسىزدىككە قاتىستى دا ءوز پىكىرىن اشىق جەتكىزگەن.

"وزىمىزدەگى اۋدارما سالاسىنىڭ مۇگەدەكتىگىنە قاراماستان الەم تىلدەرىنە اۋدارىلىپ، اقشا بەرىپ تانىمال بولۋ. مارسەل پرۋست، دجەيمس دجويس، فرانس كافكا، دوستايەۆسكيي، ماريو ۆارگاس لوسا، بورحەس، سەميۋەل بەكەت، جان پول سارتر، البەر كاميۋ جانە ت.ب اۆتورلاردى ءتۇپنۇسقادان تولىق اۋدارماي جاتىپ الەمگە قۇلاش سەرمەۋ. بۇل دون كيحوتتىق! باسقا ايتارىم جوق!" – دەيدى ت. ىرىسبەك.