«Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەكتىڭ وڭىرلەرگە ساپارى جالعاسۋدا. ول پاۆلودار وبلىسىنىڭ شالعايداعى ءبىرقاتار ەلدى مەكەندەرىنىڭ تۇرعىندارىمەن كەزدەسىپ، كوكەيكەستى ماسەلەلەردى سول جەردە تالقىلاپ، شەشىمىن بىرگە قاراستىردى.

جۇمىس ساپارىنىڭ ءبىرىنشى كۇنى باۋىرجان بايبەك نوۆوچەرنوياركا اۋىلىنىڭ تۇرعىندارىمەن كەزدەستى. مۇندا 16 كوپ قاباتتى تۇرعىن ءۇيدىڭ 800-گە جۋىق تۇرعىنى ورتالىق جىلىتۋ جۇيەسىنسىز تۇرىپ جاتىر. اۋىل تۇرعىندارى بۇل ماسەلەنى وسىعان دەيىن بىرنەشە رەت كوتەرگەن، ءتىپتى پارتيانىڭ قوعامدىق قابىلداۋى ارقىلى دا قوزعاعان ەكەن.
«تۇرعىندارمەن بىرگە وسىنىڭ شەشۋ جولدارىن تالقىلادىق. ايماق باسشىلىعى اۋىلدا جىلىتۋ قازاندىعى سالىنادى دەپ ءسوز بەردى. بۇل اتالعان تۇرعىن ۇيلەردەن بولەك تاعى دا 5 الەۋمەتتىك نىساندى، ونىڭ ىشىندە تاياۋ ماڭدا ورنالاسقان مەكتەپتى، بالا باقشانى جانە دارىگەرلىك امبۋلاتوريانى جىلىتۋمەن قامتاماسىز ەتپەك. ونىڭ ورىندالۋىن «Nur Otan» ءوز باقىلاۋىنا الدى»، - دەدى باۋىرجان بايبەك ءوز Facebook پاراقشاسىندا.

ونىڭ ايتۋىنشا، پاۆلودار وبلىسىنا ساپارعا شىعار الدىندا ول بۇقارالىق اقپارات قۇرالدارى مەن الەۋمەتتىك جەلىلەر ماتەريالدارى ارقىلى ءوڭىردىڭ كوكەيكەستى ماسەلەلەرىمەن مۇقيات تانىسقان. بيلەۋشى پارتيا ءتوراعاسىنىڭ ءبىرىنشى ورىنباسارى بىرنەشە جىلدان بەرى وبلىس ورتالىعىندا «ەكىنشى پاۆلودار» ىقشام اۋدانىنداعى جەكە تۇرعىن ۇيلەردى ەرىگەن جانە جەر استى سۋلارى دەڭگەيىنىڭ كوتەرىلۋى سالدارىنان سۋ باسۋى ماسەلەسىنە نازار اۋداردى.
ماسەلەنىڭ وزەكتىلىگى ەسكەرىلە وتىرىپ، وبلىستىڭ جاڭا اكىمىمەن تۇرعىنداردىڭ كەزدەسۋى ۇيىمداستىرىلدى. ءابىلقايىر سقاقوۆتىڭ ايتۋىنشا، ماسەلەنى جۇيەلى جانە جان-جاقتى شەشۋ ءۇشىن ءتيىستى ماماندار مەن ساراپشىلار تارتىلاتىن بولادى. سونىمەن قاتار، 8 شاقىرىم كارىز جەلىلەرىن تارتۋ جانە تاعى 10 شاقىرىم كوممۋنيكاسيانى سالۋ ءۇشىن جوبالىق-سمەتالىق قۇجاتتاما ازىرلەنەدى. بۇدان بۇرىن جەر استى سۋلارىنىڭ دەڭگەيىن تومەندەتۋ ءۇشىن 5 قۇدىق بۇرعىلانىپ، سۋ ساقتاۋ شۇڭقىرى سالىنعان، 3 سورعى ستانسياسى ورناتىلعان.
كەزدەسۋدە جەرگىلىكتى تۇرعىندار مونوپوليست كومپانيا «پاۆلودار سۋ كانالى» جشس-نا قاراتا تاريفتەردىڭ، سۋدى ەسەپتەۋ اسپاپتارى قۇنىنىڭ ايقىندىعىنا قاتىستى نارازىلىقتارىن دا ءبىلدىردى. باۋىرجان بايبەك ءوز كەزەگىندە تاياۋ ۋاقىتتا پارتيا الاڭىندا بارلىق مۇددەلى ورگانداردىڭ قاتىسۋىمەن اشىق پارتيالىق تىڭداۋ وتكىزۋدى تاپسىردى.

جۇمىس ساپارى بارىسىندا پارتيا ءتوراعاسىنىڭ ءبىرىنشى ورىنباسارى «مۇنايحيم» كاسىپورنىنىڭ قىزمەتكەرلەرىمەن دە كەزدەستى. مۇندا الەۋمەتتىك جانە ەڭبەك قۇقىقتارىن قورعاۋ سالاسىنداعى وزەكتى ماسەلەلەر تالقىلاندى. باۋىرجان بايبەك ەلباسى باستاماسىمەن قولعا الىنعان يندۋستريالاندىرۋ باعدارلاماسىنىڭ ارقاسىندا وڭىردە مىڭداعان جۇمىس ورنىنىڭ اشىلعانىن تىلگە تيەك ەتتى.
«جۇمىسپەن قامتۋمەن قاتار جايلى جانە ءقاۋىپسىز ەڭبەك جاعدايىن جاساۋ قاجەت. بۇل ءۇشىن باستاۋىش پارتيا ۇيىمدارى كاسىپوداقتارمەن بىرلەسىپ كاسىپورىن باسشىلىعىنا تۋىنداعان ماسەلەلەر مەن قىزمەتكەرلەردىڭ ۇسىنىس-تىلەكتەرىن ۋاقتىلى جەتكىزىپ وتىرۋى ءتيىس. بۇل رەتتە بىردە-بىر سۇراقتى نازاردان تىس قالدىرۋعا بولمايدى. پرەزيدەنتىمىزدىڭ «حالىق ۇنىنە قۇلاق اساتىن مەملەكەت» تۇجىرىمداماسىنىڭ ناقتى ىسكە اسۋى دەگەنىمىز وسى» - دەپ اتاپ ءوتتى ول.
سونىمەن قاتار باۋىرجان بايبەك پاۆلودار وبلىسىنداعى پارتيا اكتيۆىمەن كەزدەسۋ وتكىزىپ، وندا ءساۋىر-مامىر ايلارىندا اشىق ىشكى پارتيالىق سايلاۋ - پرايمەريز وتكىزۋگە دايىندىق بارىسى تۋرالى پىكىر الىستى.
«پارتيامىزدىڭ ليدەرى، ەلباسىنىڭ تاپسىرماسى بويىنشا بارلىق دەڭگەيدەگى ءماسليحاتتارعا ۇسىنىلاتىن ءتىزىمدى ءتۇزۋ كەزىندە وندا ايەلدەردىڭ 30%-تەن، ال 35 جاسقا دەيىنگى جاستاردىڭ 20%-تەن كەم بولماۋىنا قول جەتكىزۋ جوسپارلانۋدا.
سونداي-اق ءماسليحاتتارعا باسقا دا الەۋمەتتىك توپتار وكىلدەرى ۇسىنىلۋى ءتيىس. اتاپ ايتقاندا، ەرەكشە قاجەتتىلىكتەرى بار جاندار، كوپبالالى انالار جانە تاعى باسقالارى قامتىلۋى كەرەك. بۇل رەتتە قوعامدىق پىكىر كوشباسشىلارىن جانە ۇكىمەتتىك ەمەس ۇيىمداردىڭ ەل ىشىندە ءسوزى ءوتىمدى، جۇرتشىلىقتىڭ سەنىمىنە يە بولعان وكىلدەرىن ىلگەرىلەتۋگە باسا نازار اۋدارىلادى.
ءبىزدىڭ قاعيداتىمىز – «جىگەرلى ليدەرلەر – قۋاتتى پارتيا». ازاماتتىق قوعاممەن قويان-قولتىق ارالاسىپ، ءوزارا بىرلەسە ارەكەت ەتۋ عانا ازاماتتارىمىزدىڭ ءال-اۋقاتىن ارتتىرۋدى قامتاماسىز ەتۋگە جول اشاتىنىنا سەنىمدىمىن!» - دەپ مالىمدەدى پارتيا ءتوراعاسىنىڭ ءبىرىنشى ورىنباسارى.
كەزەكتەن تىس كونفەرەنسيا بارىسىندا وبلىس اكىمى ءابىلقايىر سقاقوۆ پاۆلودار وبلىستىق فيليالىنىڭ ءتوراعاسى بولىپ سايلاندى.
جۇمىس ساپارىنىڭ ءبىرىنشى كۇنىن قورىتىندىلاي كەلە، باۋىرجان بايبەك پارتيانىڭ قوعامدىق قابىلداۋ بولمەلەرىنە پاۆلودارلىقتاردان كەلىپ تۇسكەن وتىنىشتەردى ساراپتاۋ ارقىلى شەشىمىن كۇتكەن ءبىرىنشى كەزەكتەگى مىندەتتەردىڭ اۋقىمى انىقتالعانىن اتاپ ءوتتى. بۇلار – الەۋمەتتىك قامتۋ، ءبىلىم بەرۋ، دەنساۋلىق ساقتاۋ، قورشاعان ورتانى قورعاۋ ساپاسى، سونداي-اق، تۇرعىن ءۇي قورىنىڭ ماردىمسىز جاعدايى، ەلدى مەكەندەردى اباتتاندىرۋ جانە تاعى دا باسقا كوپتەگەن ماسەلەلەر.
«ازاماتتارىمىزدى الاڭداتىپ وتىرعان ماسەلەلەر بۇگىندە ازىرلەنىپ جاتقان ايماقتى دامىتۋدىڭ 5 جىلدىق باعدارلاماسىنا ەنگىزىلەدى. ءبىز ءار قالانى، اۋداندى جانە اۋىلدى قامتۋدى جوسپارلاپ وتىرمىز. وسى باعىتتاعى جۇمىستاردى پارتيا ورتالىق جانە جەرگىلىكتى مەملەكەتتىك ورگاندارمەن بىرلەسە وتىرىپ بىرنەشە ايدان بەرى جۇرگىزىپ تە كەلەدى. «Nur Otan» ءتۇيىندى ماسەلەلەرگە قۇلاق اسىپ قانا قويماي، ولاردى شەشۋ ءۇشىن ناقتى شارالاردى قولعا الۋى كەرەك. ول ءۇشىن بىزدە قاجەتتى رەسۋرستار بار، ەڭ باستىسى، قاراپايىم حالىق قولداپ وتىر» - دەدى ول.