جەتىساي اۋدانىندا باۋىرجان بايبەك اباي اۋىلىنىڭ تۇرعىندارىمەن جۇزدەسىپ، ولار ءۇشىن اسا وزەكتى بولىپ وتىرعان ەگىس القاپتارىن سۋارۋ ماسەلەسىنىڭ ءمان-جايىنا قانىقتى. مۇندا بىرنەشە جىلدان بەرى 2600-دەن استام شارۋا قوجالىقتارى پايدالاناتىن ك-30 سۋارۋ كانالىن قايتا قالپىنا كەلتىرۋ اياقتالماي كەلەدى.
«تۇرعىندار ايتقانداي، كانالدى بەتونداۋ جۇمىستارى مەرزىمىنەن كەشىكتىرىلىپ، كوبىنەسە ساپاسىز جۇرگىزىلەدى. اتالعان ماسەلە، ورتالىق، جانە جەرگىلىكتى اتقارۋشى ورگاندار جۇمىسىن ۇيلەستىرۋدى قاجەت ەتەدى. شارۋا قوجالىقتارىنىڭ باسشىلارىمەن بىرگە ماقتا يندۋسترياسىن دامىتۋعا مەملەكەتتىك قارجىلاي كومەك كورسەتۋ ماسەلەسىن دە كوتەردىك. بۇل ماسەلەلەردى ەلوردادا پارتيالىق الاڭدا پارتيا مۇشەلەرى – اۋىل شارۋاشىلىعى جانە تابيعي رەسۋرستار مينيسترلەرىنىڭ قاتىسۋىمەن ەگجەي-تەگجەيلى تالقىلاۋدى جوسپارلاپ وتىرمىز. قورىتىندىسىن تۇرعىندارعا قوسىمشا حابارلايمىز»، – دەپ جازدى باۋىرجان بايبەك ءوزىنىڭ Instagram پاراقشاسىندا.
بۇدان كەيىن پارتيا ءتوراعاسىنىڭ ءبىرىنشى ورىنباسارى وتىرار اۋدانىنىڭ ءشاۋىلدىر اۋىلىنا ات باسىن تىرەدى. مۇندا بۇرىن 300-دەن استام وتباسى جىلۋ ماسەلەسىنە بايلانىستى «Nur Otan»-عا حابارلاسقان بولاتىن.
«ەلباسىنىڭ باستاماسىمەن قولعا الىنعان «اۋىل – ەل بەسىگى» جوباسىنىڭ اياسىندا بۇگىندە ەلىمىزدىڭ شالعاي اۋداندارىنىڭ تۇيىتكىلدى ماسەلەلەرىن شەشۋ بويىنشا پارتيا جۇيەلى شارالار ازىرلەۋدە. وبلىس اكىمىنىڭ ايتۋىنشا، جاقىن ارادا بيۋدجەتتى ناقتىلاۋ كەزىندە جىلۋ جۇيەلەرىن سالۋ ءۇشىن 700 ملن. تەڭگەدەن استام قارجى بولىنەدى. قازاندىقتىڭ قۇرىلىسىنا قاراجات بولىنگەن. اۋىل تۇرعىندارى كوتەرگەن ماسەلەنى شەشۋ «Nur Otan» پارتياسىنىڭ باقىلاۋىنا الىندى»، – دەپ اتاپ ءوتتى باۋىرجان بايبەك.
تۇركىستان وبلىسىنا جۇمىس ساپارى بارىسىندا بيلەۋشى پارتيا باسشىلىعى جەتىساي قالاسىنداعى 1964 جىلى سالىنعان اپاتتى جاعدايداعى ەمحانانىڭ ورنىنا جاڭادان بوي كوتەرگەن قالالىق ەمحانانىڭ عيماراتىمەن تانىستى. ءتيىستى مەديسينالىق جابدىقتاردىڭ تولىق جەتكىزىلمەۋىنەن بۇل نىسان بىرنەشە ايدان بەرى پايدالانۋعا بەرىلمەي كەلەدى. جەرگىلىكتى بيلىك بۇل ماسەلەنى تاياۋ ارادا شەشەمىز دەپ ءسوز بەردى.
سول كۇنى باۋىرجان بايبەك قازىبەك اۋىلىنا دا بارىپ، وبلىستاعى ىزگى جۇرەكتى كاسىپكەرلەردىڭ كومەگىمەن باسپاناعا قول جەتكىزگەن وتباسىلارمەن كەزدەستى.
«باقىتتى وتباسى» پارتيالىق جوباسىنىڭ اياسىندا وبلىستا قيىن جاعدايعا تاپ بولعان وتباسىلارعا قولداۋ كورسەتۋگە باعىتتالعان «قامقورلىق» قايىرىمدىلىق باعدارلاماسى تابىستى جۇزەگە اسىرىلۋدا. 
«جەتىساي اۋدانىندا الەۋمەتتىك قولداۋدى قاجەت ەتەتىن 141 وتباسى تىركەلگەن. ءوڭىر باسشىلىعىنىڭ باستاماسىمەن ولاردىڭ اربىرىنە «Nur Otan»-نىڭ مۇشەلەرى مەن جاقتاستارى اراسىنان كۋراتورلار بەكىتىلدى. 86 وتباسىعا ماتەريالدىق كومەك كورسەتىلدى. دەمەۋشىلىك قاراجاتتىڭ ەسەبىنەن 10 مۇقتاج وتباسىعا ءۇي سالىنىپ جاتىر.
مەنىڭ ويىمشا، بۇل – داڭقتى بابامىز، ۇلى فيلوسوف، ويشىل ءال-فارابي تۇجىرىمداعان ىزگى جانە قايىرىمدى قوعامنىڭ ناقتى مىسالى. ىنتىماقتاستىق، ادىلدىك، ءوزارا سەنىم جانە جاۋاپكەرشىلىك، السىزدەردى قۋاتتى، جاعدايى جوقتى اۋقاتتى ادامداردىڭ قولداۋى – «Nur Otan» پارتياسى ۇستاناتىن وزگەرمەس باستى قۇندىلىقتار»، – دەپ اتاپ ءوتتى باۋىرجان بايبەك. 
ەسكە سالا كەتەيىك، ەلباسى تاپسىرماسى بويىنشا «Nur Otan» پارتياسى بىرنەشە ايدان بەرى ۇكىمەتپەن جانە وڭىرلىك فيليالدارمەن بىرلەسە وتىرىپ، الداعى 5 جىلعا اۋدانداردى، قالالاردى جانە وبلىستاردى دامىتۋدىڭ جاڭا باعدارلاماسىن ازىرلەپ جاتىر. اتالعان باعدارلامالاردا ءاربىر جەكەلەگەن ءوڭىردىڭ جەرگىلىكتى ەرەكشەلىكتەرى ەسكەرىلىپ، ازاماتتاردىڭ ناقتى قاجەتتىلىكتەرى كورىنىس تاباتىن بولادى. وسى جۇمىستاردىڭ اياسىندا «Nur Otan» پارتياسىنىڭ باسشىلىعى ەلىمىزدىڭ بارلىق ءوڭىرىن، ءتىپتى شالعاي ەلدى مەكەندەرىن دە ارالاپ شىعادى. بۇگىنگى شارالار اياقتالعان سوڭ باۋىرجان بايبەك بىردەن قىزىلوردا وبلىسىنا جۇمىس ساپارىمەن جول تارتتى.
پىكىر قالدىرۋ