الەۋمەتتىك جەلىدە ءوزىن الماتى وبلىسى كوكسۋ اۋدانى مۇقىرى اۋىلى قالقا جاپساربايەۆ اتىنداعى ورتا مەكتەپتىڭ قازاق ءتىلى ءپانىنىڭ ءمۇعالىمى مايرا بايبولاتوۆا دەپ تانىستىرعان كەلىنشەكتىڭ بەينەۇندەۋى تارالۋدا. ءمۇعالىم ۇندەۋىن ءبىلىم جانە عىلىم ءمينيسترى اسحات ايماعامبەتوۆكە ارناعان.

ۆيدەو كەشكى ۋاقىتتا، قاس قارايعان شاقتا تۇسىرىلگەن. ءمۇعالىم ءوزىنىڭ ۇيىندە ينتەرنەت ۇستامايتىندىقتان، تۇرمىستاعى ءسىڭلىسىنىڭ ۇيىنە Kundelik.kz-كە كىرۋ ءۇشىن نوۋتبۋگىن ارقالاپ، ءتۇن جارىمدا بارا جاتقانىن ايتادى.

– ءسىڭلىم كوپ بالالى انا، جولداسى، بالا-شاعاسى بار. بىرەۋدىڭ ۇيىنە ارقالانىپ بارىپ، ولاردىڭ بەرەكەسىن العانىم دۇرىس ەمەس ەكەنىن بىلەمىن. ءبىراق امال نەشىك، ۇيىمدە، اۋىلىمدا ينتەرنەت جوق بولعان سوڭ وسىلاي جۇرۋىمە تۋرا كەلەدى. قاشىقتان وقۋتۋ باستالعانى ەكىنشى كۇن قاتارىنان وسىلاي ءجۇرمىن. بىرەۋدىڭ ۇيىنە بارىپ جۇمىس ىستەۋ قيىن. ءبىلىم جانە عىلىم ءمينيسترى اسحات ايماعامبەتوۆ، اۋىلىمىز تىنىش، دەسە دە ءتۇن ىشىندە ەكى كوشەنىڭ اراسىندا سابىلىپ جۇرگەن ماعان قيىن. كارانتين كەزىندە وسىلاي جۇرۋگە بولا ما؟!، – دەيدى ءمۇعالىم. 

"ۇرپاقتى قالاي وقىتامىن، قالاي ەل قاتارلى جۇمىس ىستەپ، قالاي كرەديتىمدى جابامىن دەگەن مەن سياقتى جاس ۇستازعا وسىلاي ءجۇرۋ وتە اۋىر" دەگەن ول بۇل جاعداي قازاقستانداعى كوپتەگەن ۇستازدىڭ باسىنداعى قيىندىق ەكەنىن ايتتى.

– مەن باسىندا ءۇيى جوق، كۆارتيرادا تۇراتىن، سول كۆارتيراسىندا ينتەرنەتى جوق كەدەي مەملەكەتتىڭ كەدەي ءمۇعالىمىمىن. سول ءۇشىن وكپەلىمىن. جاعدايىڭ بولماسا سەنىڭ ءبىلىمىڭ ەشكىمگە قاجەت ەمەس. مۇنداي ءمۇعالىم الدىنداعى بالانى قالاي تاربيەلەيدى. قالاي ول ۇرپاققا ۇلتتىق رۋح، پاتريوتتىق سەزىمدى ۇعىندىرادى" دەگەن ۇستاز كوز جاسىنا ەرىك بەردى.