قىتايدىڭ ءاعىلشىنتىلدى Global Times باسىلىمى جۇڭگو تاريحي وقۋلىقتارداعى قازاقستانعا قاتىستى تۇستاردىڭ مازمۇنىنا ۇلكەن ءمان بەرەتىنىن ءمالىم ەتتى، دەپ جازادى قامشى ءتىلشىسى.

14 ساۋىردە قازاقستان سىرتقى ىستەر مينيسترلىگىنىڭ وكىلى قازاقستانداعى جۇڭگو ەلشىسى چجان سياومەن كەزدەسكەندە جاسوسپىرىمدەردى دۇرىس تاريحي كوزقاراسقا تاربيەلەۋ ءۇشىن، ەكى ەل اراسىنداعى دوستىقتىڭ ۇرپاقتان ۇرپاققا جالعاسۋى ءۇشىن وقۋلىقتاردىڭ مازمۇنىنا ءمان بەرۋ كەرەكتىگى ايتىلعان.

Reuters "قازاقستاننىڭ سىرتقى ىستەر مينيسترلىگى سەيسەنبىدە ماقالاعا نارازىلىق ءبىلدىرۋ ءۇشىن جۇڭگو ەلشىسىن شاقىرعان" دەپ جازسا، قىتايدىڭ قازاقستانداعى ەلشىسى چجان سياو Global Times گازەتىنە بۇل ادەتتەگى ديپلوماتيالىق كەزدەسۋ ەكەنىن جانە ول جايباراقات جانە دوستىق جاعدايدا وتكەنىن ايتقان.

چجان قازاقستاندىق تاراپتىڭ ءوتىنىشىن قىتايداعى ءتيىستى ۆەدومستۆولارعا جىبەرۋگە ۋادە بەرگەن.

14 ساۋىردەگى كەزدەسۋدە قازاقستان سىرتقى ىستەر مينيسترلىگىنىڭ وكىلى قىتايلىق Sohu.com سايتىندا جاريالانعان "قازاقستان نەگە قىتايعا ورالۋعا تىرىسادى" اتتى ماقالاعا قاتىستى نارازىلىق بىلدىرگەن بولاتىن. ال قازاقستاننىڭ قىتايداعى ەلشىلىگى قىتايدىڭ سىرتقى ىستەر مينيسترلىگىنە نارازىلىق نوتا جولداعان.

ارتىنشا جۇڭگو سايتتارى قازاقستانعا قاتىستى داۋلى ماقالانى ءوشىردى.

قازاقستانداعى جۇڭگو ەلشىسى چجان سياو "جۋىردا قىتايدىڭ تاۋەلسىز كونتەنتىندە جاريا بولعان ماقالا ەشبىر رەسمي ورىنداردىڭ كوزقاراسىن تانىتپايدى. الايدا، بۇل جاعداي قازىرگى تاڭدا عالامتوردىڭ جالعان، لاس، ءارى ءارقيلى وسەك-اياڭ اقپاراتتارعا تولىپ كەتكەنىن ايشىقتاپ بەردى" دەپ مالىمدەگەن.

سونداي-اق ول ءوزىنىڭ facebook پاراقشاسىندا "جاستارعا وبەكتيۆتى تاريحتى دۇرىس كورسەتۋ قاجەتتىلىگىن" جازعان.