9 مامىرعا اقشالاي تولەمدەر ارداگەرلەردىڭ جەسىرلەرىنە، تىل ەڭبەككەرلەرىنە جانە باسقا دا ءبىرقاتار ساناتتارعا قاراستىرىلعان، دەپ حابارلايدى ەلوردا اكىمدىگىنىڭ رەسمي سايتى.

1941-1945 جىلدارداعى كسرو-گەرمانيا سوعىسىنداعى جەڭىستىڭ 75 جىلدىعىن مەرەكەلەۋگە بايلانىستى نۇر-سۇلتاندا سوعىس قاتىسۋشىلارى مەن مۇگەدەكتەرى 1 ملن تەڭگەدەن الادى.

قازىرگى تاڭدا ەلوردادا 44 ارداگەر بار. سونىمەن قاتار، تىل ەڭبەككەرلەرى، سوعىسقا قاتىسۋشىلاردىڭ ايەلدەرى، سونداي-اق جەڭىلدىكتەر مەن كەپىلدىكتەر بويىنشا ارداگەرلەرگە تەڭەستىرىلگەن بارلىق ادامدار دا ءبىر جولعى اقشالاي تولەمدەردى الادى.

اتاپ ايتقاندا، جەڭىلدىكتەر مەن كەپىلدىكتەر بويىنشا كسرو-گەرمانيا سوعىسىنىڭ قاتىسۋشىلارى مەن مۇگەدەكتەرىنە تەڭەستىرىلگەن ادامدارعا – 75 مىڭ تەڭگەدەن (405 ادام)، جەڭىلدىكتەر مەن كەپىلدىكتەر بويىنشا سوعىسقا قاتىسۋشىلارعا تەڭەستىرىلگەن ادامدارعا، ونىڭ ىشىندە قازا تاپقان اسكەري قىزمەتشىلەردىڭ وتباسىلارىنا، سوعىس جىلدارىندا قايتىس بولعان ارداگەرلەردىڭ جەسىرلەرىنە، تىل ەڭبەككەرلەرىنە – 32 500 تەڭگەدەن (3 529 ادام) ءبىرجولعى اقشالاي تولەمدەر قاراستىرىلعان.