مەملەكەت تاراپىنان سۋبسيديالاناتىن جۇمىس ورىندارىنىڭ كولەمى 90 مىڭنان 211 مىڭعا ارتتى. بۇل تۋرالى ۇكىمەت وتىرىسىندا ق ر پرەمەر-مينيسترىنىڭ ورىنباسارى ەرالى توعجانوۆ ايتتى، دەپ حابارلايدى قازاقپارات ءتىلشىسى.

– جۇمىسپەن قامتۋ ماسەلەسى ارنايى قۇرىلعان ۆەدومستۆوارالىق كوميسسيانىڭ 6 وتىرىسىندا قاراستىرىلعان بولاتىن. مەملەكەتتىك ورگاندارعا، وڭىرلەرگە 50-دەن استام ناقتى تاپسىرما بەرىلدى. ونىڭ ىشىندە بۇكىل كەمشىلىككە بايلانىستى تاپسىرمالاردى وڭىرلەر الدى. جالپى، جۇمىسپەن قامتۋ جول كارتاسى بويىنشا جوبالاردىڭ تورتتەن ءبىرى ءبىلىم سالاسىنداعى نىساندارعا قاتىستى. ونىڭ ىشىندە 1 400-گە جۋىعى مەكتەپ، بالاباقشا، ينتەرناتتاردى قۇرايدى، – دەدى ول.

ونىڭ اتاپ وتۋىنشە، جوبالارعا 50 پايىز قىزمەتكەرلەردى جۇمىسپەن قامتۋ ورتالىقتارى ارقىلى تارتۋ تالابى تولىق ورىندالىپ وتىر. «ەڭبەك» باعدارلاماسى اياسىندا 6 مىڭنان استام ميكروكرەديت پەن گرانت بەرىلىپ جاتىر. ونىڭ ىشىندە 30 پايىزىن از قامتىلعان جانە كوپبالالى وتباسىلار، مۇگەدەكتىگى بار ازاماتتار جانە جاستار قۇرايدى. مەملەكەت تاراپىنان سۋبسيديالاناتىن جۇمىس ورىندارىنىڭ كولەمى 90 مىڭنان 211 مىڭعا ءوسىپ وتىر.

– اسقار ۇزاقباي ۇلى، حالىقتى جۇمىسپەن قامتۋ ماقساتىندا ءتيىستى مەملەكەتتىك ورگاندار مەن اكىمدىكتەرگە بىرىنشىدەن، جۇمىسپەن قامتۋ اياسىنداعى مەملەكەتتىك باعدارلامالارداعى تەتىكتەردى ءتيىمدى ىسسە اسىرۋدى، ەكىنشىدەن ءاربىر جۇمىستان بوساتىلعان ازاماتپەن جۇمىس جاساپ، مەملەكەتتىك قولداۋ كورسەتۋدى، ۇشىنشىدەن، مەملەكەتتەن ءبولىنىپ جاتقان قاراجاتتى ماقساتتى تۇردە پايدالانۋدى قامتاماسىز ەتۋدى تاپسىرۋىڭىزدى سۇرايمىز، – دەپ ءوتىندى ەرالى توعجانوۆ پرەمەر-مينيستر اسقار ماميننەن.