قازاقستاندا كوروناۆيرۋس پەن پنيەۆمونيا ورشىگەن تۇستا ەلدە ەرىكتىلەر توبى كوبەيىپ، جۇرت بىر-بىرىنە كومەكتەسە باستادى. قازاقستاننىڭ باتىسىنداعى اقتوبەدە دە احۋال كۇردەلى. ايماقتىڭ ەكى مىڭعا جۋىق تۇرعىنى COVID-19 ينفەكسياسىن جۇقتىرىپ، ءۇش مىڭداي ادام پنيەۆمونياعا شالدىققان. وسىدان كەيىن اقتوبەدەگى بىرنەشە قوزعالىس كۇش بىرىكتىرىپ، “AntiCovid-19” دەپ اتالاتىن ەرىكتىلەر بىرلەستىگىن قۇردى. ازاتتىق وسى توپتىڭ مۇشەلەرىمەن تىلدەستى.
“ءبىز سىيلاعان اپپارات ءبىر ادامدى اجالدان قۇتقارسا، كۇللى الەم ىندەتتەن ارىلعانداي قۋانامىز”
ەكاتەرينا گولوتينا، 33 جاستا، مەيرامحانا، قوناق ءۇي سالاسىنىڭ مامانى. “AntiCovid-19” ەرىكتىلەر بىرلەستىگىنىڭ جەتەكشىسى:
؛lgbjlrkejhdgsf
ناۋرىزدا اقتوبەدە كوروناۆيرۋس جۇقتىرعاندار انىقتالا باستادى. سول كەزدە “ەرىكتىلەر بىرىگۋى كەرەك” دەپ شەشتىك. جوعالعان ادامداردى ىزدەيتىن، اۋىر ناۋقاستاردىڭ وتاسىنا قارجى جينايتىن جانە تاعى باسقا ەرىكتىلەر توبى بىرىگىپ “AntiCovid-19” دەپ اتالعان بىرلەستىك قۇردىق. “AntiCovid-19” ءبىرىنشى كارانتين كەزىندە (16 ناۋرىز – 11 مامىر) تابىسىنان ايىرىلىپ، مۇقتاجدىق كورگەن ەكى مىڭ وتباسىنا قولداۋ كورسەتتى. ازىق-تۇلىك جەتكىزدى، پاتەر اقىسىن تولەي الماي وتىرعان مۇقتاج ادامدارعا قارجى ءبولدى. وڭتۇستىكتەگى ماقتاارالدى سۋ باسقاندا گۋمانيتارلىق كومەك جىبەردى.
ماۋسىم ايىندا دارىگەرلەردى قولداۋعا كىرىستىك. ءقازىر اقتوبەنىڭ اۋرۋحانالارىندا وتتەگى تولتىراتىن قاپشىقتار مەن كونسەنتراتورلار جەتىسپەيدى. سوندىقتان قالا تۇرعىندارىنان قارجى جيناپ، ونى ۇنەمدەپ جۇمساۋعا تىرىسامىز. “AntiCovid-19” بىرلەستىگىنىڭ ءبىر مۇشەسىنە ينتەرنەتتەن كونسەنتراتور وندىرۋشىلەردى ىزدەپ، ءونىم باعاسىن سالىستىرۋ جۇكتەلگەن. وسى كەزگە دەيىن 6 كونسەنتراتورعا تاپسىرىس بەردىك. ءارقايسى 400 مىڭ تەڭگە تۇرادى. ودان بولەك اۋرۋحانالارعا 20-دان استام وتتەگى قاپشىعىن ساتىپ اپەردىك. دارىگەرلەر “سىزدەر سىيلاعان اپپارات ءبىر ادامدى اجالدان اراشالاپ قالدى” دەپ حابارلاسقاندا كۇللى الەم ىندەتتەن ارىلعانداي قۋانامىز.
ءبىر اپتادان بەرى مەنىڭ دە مۇرنىم ءيىس سەزۋدەن قالدى. دەنەمنىڭ قىزۋى دا تۇسپەي تۇر. سوندىقتان ەرىكتىلەر توبىنان وقشاۋلانىپ، ۇيدە جۇمىس ىستەپ وتىرمىن. سىن ساعاتتا كومەكتىڭ كەز كەلگەن ءتۇرى ماڭىزدى.
اقتوبەدە ەرىكتى بولعىسى كەلەتىندەر كوپ. “جالاقىسى قانشا؟ كولىگىمە بەنزين قۇياسىزدار ما؟” دەپ حابارلاساتىندار دا بار. ناعىز ۆولونتەر ەتكەن ەڭبەگى ءۇشىن ەشكىمنەن اقى دا، ماقتان دا كۇتپەيدى. ءقازىر “AntiCovid-19” بىرلەستىگىنىڭ 70-كە جۋىق بەلسەندى مۇشەسى بار.
“مەديسينالىق ءبىلىمىمىز جوق. ەسەسىنە دارىگەرلەرگە كومەكتەسىپ، بەينەتىن جەڭىلدەتە الامىز”
باقىتقالي ورازعالييەۆ، 34 جاستا، جەكە كاسىپكەر، ەرىكتى
الەمدى ىندەت جايلاعانعا دەيىن ءبىزدىڭ توبىمىز ءىز-تۇسسىز جوعالعان ادامداردى ىزدەيتىن. توتەنشە جاعدايلار دەپارتامەنتى، پوليسيامەن مەموراندۋم جاساپ، دايىندىق كۋرستارىنان ءوتىپ جۇردىك. ناۋرىزدا اقتوبە ەرىكتىلەرى كۇش بىرىكتىرىپ، كوروناۆيرۋسپەن كۇرەسە باستادى.
مىسالى، بۇگىن (9 شىلدە) ەرىكتىلەردىڭ ءبىر توبى ينفەكسيالىق اۋرۋحاناعا وتتەگى باللوندارىن ءتۇسىرىپ بەردىك. كۇن سايىن ءارقايسى 70-80 كەلىلىك باللونداردى جۇك كولىگىنەن ءتۇسىرىپ، “قىزىل زوناعا” دەيىن جەتكىزىپ بەرەمىز. ارينە، كومەك قاجەت بولسا، ول جاققا بارۋدان دا باس تارتپاس ەدىك. ءبىراق ەرىكتىلەردى “قىزىل زوناعا” وتكىزبەيدى. ءبىزدىڭ مەديسينالىق ءبىلىمىمىز جوق. ەسەسىنە دارىگەرلەرگە كومەكتەسىپ، بەينەتتەرىن جەڭىلدەتە الامىز. ولار “وتتەگى تاۋسىلىپ قالدى”، “اس ازىرلەۋىم كەرەك” دەپ الاڭداماۋى ءتيىس.
اۋرۋحانالاردا ەر ادامدار از. تەحنيكالىق پەرسونالدىڭ باسىم كوپشىلىگى قىز-كەلىنشەكتەر. تالدىرماش قىزعا 70-80 كەلىلىك وتتەگى باللوندارىن تاسۋ وڭاي ەمەس. ىندەتپەن كۇرەسۋشى مەديسينا مەكەمەلەرىنىڭ بارىنە قول كومەگى كەرەك. ولارعا قول ۇشىن بەرۋ ەرىكتىلەرگە زور مارتەبە. مەن بۇرىن مۇنداي سەزىمدەردى ءىز-تۇسسىز جوعالعان جاسوسپىرىمدەردى تاۋىپ العان كەزدە باسىمنان وتكەرەتىنمىن. ەرىكتىلەردىڭ ءبارى – الترۋيست. ال الترۋيستەر وزگەگە باقىت سىيلايتىن، وزدەرى دە وتە باقىتتى ادامدار.
پىكىر قالدىرۋ