قازاقستاندا ماۋسىم ايىندا COVID-19-بەن كۇرەسكە تارتىلعان 53 مىڭ مەديسينا قىزمەتكەرىنە ۇستەمەاقى تولەۋ ءجۇرىپ جاتىر. رەسپۋبليكالىق بيۋدجەتتەن مەديسينالىق ساقتاندىرۋ قورىنا 35،7 ملرد تەڭگە ءبولىندى. بۇل تۋرالى ممسق-نىڭ حابارلاماسىندا ايتىلعان.
ناۋرىز ايىنان ماۋسىم ايىنا دەيىن قور قارجىلىق وپەراتور رەتىندە مەديسينا قىزمەتكەرلەرىنىڭ جالاقىسىنا قوسىمشا 32 ملرد تەڭگەدەن استام قارجى تولەدى.
قور وكىلدەرى اي سايىن ينفەكسيامەن ءقاۋىپتى جاعدايلاردا جۇمىسقا تارتىلعان مەديسينا قىزمەتكەرلەرىنىڭ سانى ارتىپ كەلە جاتقانىن اتاپ ءوتتى.
"ەگەر ناۋرىز ايىندا 19 مىڭنان استام قىزمەتكەر ۇستەمە العان بولسا، مامىر ايىندا ولاردىڭ سانى 40 مىڭ ادامعا دەيىن ءوستى" دەلىنگەن حابارلامادا.
قازاقستاندا ەپيدەمياعا قارسى ءىس-شارالارعا قاتىساتىن مەديسينا قىزمەتكەرلەرىنىڭ جالاقىسىن كوتەرۋ قاراستىرىلعان. دەنساۋلىق ساقتاۋ مينيسترلىگىنىڭ بۇيرىعىمەن تاۋەكەل توپتارى، الۋشىلاردىڭ تىزىمدەرىن قالىپتاستىرۋ ءتارتىبى جانە تولەمدەر مولشەرى انىقتالعان. تاۋەكەل توبىنا بايلانىستى مەديسينا قىزمەتكەرلەرىنە قوسىمشا 212 مىڭ تەڭگەدەن 850 مىڭ تەڭگەگە دەيىن تولەنەدى.
ۇستەمەاقى الۋشىلاردىڭ تىزىمدەرىن جەدەل شتابتار جانىنان قۇرىلعان وڭىرلىك كوميسسيالار جاسايدى. كوميسسياعا اكىم ورىنباسارلارى ءتوراعالىق ەتەدى. ولاردىڭ قۇرامىنا سونداي-اق مەديسينالىق ساقتاندىرۋ قورى فيليالدارىنىڭ قىزمەتكەرلەرى، وڭىرلىك مەملەكەتتىك باس سانيتار دارىگەر، دەنساۋلىق ساقتاۋ باسقارمالارىنىڭ، ۇكىمەتتىك ەمەس ۇيىمداردىڭ وكىلدەرى كىرەدى.
كوروناۆيرۋسپەن اۋىرعان مەديسينا قىزمەتكەرلەرىنە تولەمدەردى وڭىرلىك كوميسسيالاردىڭ شەشىمى نەگىزىندە وڭىرلەردىڭ دەنساۋلىق ساقتاۋ باسقارمالارىنىڭ وتىنىمدەرى بويىنشا ەڭبەك جانە حالىقتى الەۋمەتتىك قورعاۋ مينيسترلىگى تولەيدى.
پىكىر قالدىرۋ