ءبىلىم جانە عىلىم ءمينيسترى اسحات ايماعامبەتوۆ مەملەكەتتىك جالپىعا مىندەتتى ستاندارتقا وزگەرىستەر ەنگىزىلگەنىن حابارلاپ، «الىپپە» مەن «انا ءتىلى» وقۋلىقتارى قايتارىلاتىنىن ايتتى. بۇل تۋرالى ول Facebook پاراقشاسىندا جازدى.
– جاقىندا مەملەكەتتىك جالپىعا مىندەتتى ستاندارتقا وزگەرىستەر ەنگىزىلىپ، ادىلەت مينيسترلىگىندە تىركەۋدەن ءوتتى. ونداعى ماڭىزدى جاڭالىقتاردىڭ ءبىرى – كەلەسى وقۋ جىلىندا ءبىرىنشى سىنىپ وقۋشىلارى «ساۋات اشۋ» ءپانىنىڭ ورنىنا «الىپپە» مەن «انا ءتىلىن» وقيتىن بولادى. ءبىرىنشى سىنىپ وقۋشىلارى وقۋ جىلىنىڭ باستاپقى ەكى توقسانىندا «الىپپەنىڭ» باعدارلاماسىن وقىسا، قالعان ەكى توقساندا «انا ءتىلى» ءپانىن وقيدى. سايكەسىنشە، ورىس تىلىندە نەمەسە باسقا تىلدەردە ءبىلىم الاتىن سىنىپتاردا «بۋكۆار» مەن «وبۋچەنيە گراموتە» پاندەرى جۇرگىزىلەدى، – دەدى مينيستر.
ونىڭ ايتۋىنشا «الىپپە» احمەت بايتۇرسىن ۇلىنىڭ ادىستەمەسى نەگىزىندە دايىندالادى.
– قازىرگى كەزدە وقۋلىقتاردى ازىرلەۋ بويىنشا ۇلكەن جۇمىس جۇرگىزىلىپ جاتىر. ءبىرىڭعاي باعدارلاما جاساۋمەن اينالىساتىن جۇمىس توبىن قۇردىق. ونىڭ قۇرامىندا مىقتى ءتىل ماماندارى، ادىسكەرلەر، باستاۋىش سىنىپ مۇعالىمدەرى مەن بۇعان دەيىن وقىتىلعان «الىپپە» وقۋلىقتارىنىڭ اۆتورلارى بار. ورىنباسارىم شولپان كارينوۆا وسى جۇمىس توبىنىڭ العاشقى وتىرىسىن وتكىزىپ تە ۇلگەردى. باعدارلامالار مەن وقۋلىقتار دايىن بولعاننان كەيىن ولاردى پيلوتتىق مەكتەپتەردە سىناقتان وتكىزەمىز دەپ جوسپارلاپ وتىرمىز. كەيىن باسقا مەكتەپتەرگە جىبەرىلەتىن بولادى. بۇل ماسەلە مەنىڭ ءجىتى باقىلاۋىمدا، – دەپ جازدى اسحات ايماعامبەتوۆ جەلىدەگى پاراقشاسىندا.
ەسكە سالا كەتەيىك، بۇرىنعى ءبىلىم جانە عىلىم ءمينيسترى بولعان ەرلان ساعادييەۆ ءبىلىم جۇيەسىنە ءبىراز وزگەرىستەر ەنگىزگەن بولاتىن. ول باستاۋىش سىنىپتان "الىپپە" مەن "انا ءتىلى" وقۋلىقتارىن الىپ تاستاپ، ونىڭ ورنىنا "ساۋات اشۋ" ءپانىن ەنگىزگەن. 2015 جىل ءبىلىم جۇيەسىنە ەنگىزىلگەن ءپان بۇگىنگە دەيىن قولدانىستا بولدى.
پىكىر قالدىرۋ