قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەربايەۆ باستاعان دەلەگاسيا سەمەي پوليگونىنىڭ جابىلۋ كۇنىنە وراي شىعىس قازاقستان وبلىسىندا بولىپ، سەمەي قالاسىنداعى يادرولىق سىناقتىڭ قۇرباندارىنا ارنالعان مونۋمەنتكە گۇل شوقتارىن قويدى.

دەلەگاسيا قۇرامىندا مادەنيەت جانە سپورت ءمينيسترى اقتوتى رايىمقۇلوۆا، جازۋشىلار وداعىنىڭ ءتوراعاسى ۇلىقبەك ەسداۋلەت جانە باسقا دا ازاماتتار بار.

يادرولىق سىناقتىڭ قۇرباندارىنا ارنالعان مونۋمەنتكە گۇل شوقتارىن قويۋ راسىمىندە مەملەكەتتىك حاتشى جارتى عاسىردان استام ۋاقىت وتكىزىلىپ كەلگەن يادرولىق جارىلىستاردى تولىققاندى توقتاتىپ، پوليگوندى جابۋ بۇرىنعى كەڭەستەر وداعى باسشىلىعىنىڭ قارسىلىعىنا قاراماستان قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازاربايەۆتىڭ پاتريوتتىق، ۇلتجاندى تاريحي شەشىمى سەمەيلىكتەردىڭ عانا ەمەس، بۇكىل قازاق حالقىنىڭ، قازاقستاندىقتاردىڭ، دۇنيەجۇزىندەگى پروگرەسسيۆتى ادامزاتتىڭ قولداۋىنا يە بولعانىن اتاپ ءوتتى.

مەملەكەتتىك حاتشى پرەزيدەنت قاسىم-جومارت توقايەۆتىڭ سەمەي يادرولىق سىناق پوليگونىنىڭ جابىلۋىنىڭ اتاۋلى كۇنىنە وراي قازاقستاندىقتارعا ارناعان ۇندەۋىن وقىپ بەردى.

ودان ءارى مەملەكەتتىك حاتشى باستاعان دەلەگاسيا جانە اباي قۇنانباي ۇلىنىڭ 175 جىلدىعىن دايىنداۋ جانە وتكىزۋ جونىندەگى مەملەكەتتىك كوميسسيانىڭ ءبىر توپ مۇشەلەرى سەمەي قالاسىنداعى اباي ەسكەرتكىشىنە گۇل شوقتارىن قويىپ، «قاراعايلى» شاعىن اۋدانىنىڭ، كوپبەيىندى مادەني-سپورتتىق كەشەنىنىڭ قۇرىلىس بارىسىمەن، اباي اتىنداعى الاڭدى، اباي اتىنداعى تەاتردى قايتا قالىپىنا كەلتىرۋ، اباي اتىنداعى مۋزەيدى قايتا جاڭعىرتۋ جۇمىستارىمەن تانىستى. بۇدان كەيىن اباي اۋدانىندا بولىپ، ەل پرەزيدەنتى ق.ك.توقايەۆتىڭ اباي قۇنانباي ۇلىنىڭ 175 جىلدىعىنا وراي بەرگەن تاپسىرماسىنا سايكەس قالىپقا كەلتىرىلگەن سىرت-قاسقابۇلاقتاعى، جيدەبايداعى تاريحي نىسانداردى ارالاپ كوردى.