شۆەسيانىڭ مالمە قالاسىندا يسلامعا قارسى بەلسەندىلەر قۇران كىتاپتى ورتەپ، ۆيدەوعا تۇسىرگەن. بۇعان جاۋاپ رەتىندە ءۇش جۇزگە جۋىق مۇسىلمان قالا كوشەلەرىنە شىعىپ، كولىك قوزعالىسىن جاۋىپ، وت جاققان. بۇل تۋرالى روسسيا 24 ارناسى حابارلادى. 

شۆەسيادا بىرنەشە كۇن بۇرىن كوشە سۋرەتشىسى اتانىپ كەتكەن دان پارك ەسىمدى ازامات دانيانىڭ "قاتاڭ كەلىسىم" (Stram Kurs) پارتياسىنىڭ جەتەكشىسى، ادۆوكات راسمۋس پالۋدانمەن بىرگە مالمە بيلىگىنەن مانيفەست وتكىزۋگە رۇقسات سۇراعان. اكسيا بارىسىندا قاسيەتتى قۇران كىتاپتى ورتەۋدى دە جوسپارلاعان.

بۇعان دەيىن دە ەتنيكالىق ارازدىقتى قوزدىرعانى ءۇشىن سوتتالعان ارانداتۋشىنىڭ بۇل وتىنىشىنە كەلىسىم بەرمەگەن. ارتىنشا دانيامەن شەكارادا ۇستالىپ قالعان ادۆوكات پالۋعا شۆەسيا تەرريتورياسىنا كىرۋگە تىيىم سالىنادى. الايدا سوعان قاراماستان  پارتيا مۇشەلەرى جوسپارلارىن جۇزەگە اسىرىپ، قۇران كىتابىن ورتەپ جاتقان ۆيدەولارىمەن بولىسكەن.

بۇل جاعداي ەلدىڭ ىشىندە بۇلىكتىڭ شىعۋىنا سەبەپكەر بولدى. اشۋعا بوي الدىرعان 300-گە جۋىق ازامات اميرالسگاتان مەن شەلەگاتان كوشەلەرىنىڭ قيىلىسىندا كولىك قوزعالىسىن جاۋىپ، ءورت قويىپتى. ءدال سول جەردە نارازى توپ دوڭگەلەكتەر مەن اعاش ماتەريالدارىن لاقتىرىپ، ولاردى توقتاتپاق بولعان پوليسيا قىزمەتكەرلەرىنە بوتەلكەلەر، تاستار جانە وتشاشۋلار لاقتىرعان.

"قاتال كەلىسىم" – يسلامعا تىيىم سالۋدى جانە بارلىق "باتىستىق ەمەس" ادامداردى دانيادان شىعارۋدى قولدايتىن پارتيا سانالادى.