ءبىلىم جانە عىلىم ءمينيسترى اسحات ايماعامبەتوۆ ءبىلىم سالاسىنداعى ءبىرقاتار ولقىلىقتى ايتتى. بۇل تۋرالى ول وقۋلىقتاردىڭ ساپاسى بويىنشا وتكەن ونلاين جينالىس كەزىندە مالىمدەدى.

– مەملەكەت باسشىسىنىڭ تاپسىرماسى اياسىندا وقۋلىقتاردى دايىنداۋ جۇيەسى تولىعىمەن وزگەردى. وقۋلىق ساپالى ءبىلىم الۋدىڭ وتە ماڭىزدى قۇرالى ەكەنى ايدان انىق. ءبىز بۇعان دەيىن ايتقانىمىزداي، ۇلكەن وزگەرىستى ەنگىزدىك. بۇكىل نورماتيۆتىك-قۇقىقتىق قۇجاتتار بەكىتىلدى. ادىلەت مينيسترلىگىندە تىركەلدى. سوندىقتان ءقازىر جاڭا ءتارتىپ ورناتىلدى. بۇدان كەيىن شىعاتىن وقۋلىقتاردىڭ ساپاسى مۇلدەم باسقاشا بولادى. ارينە، سۇراق كوپ. ونى ءبارىمىز بىلەمىز. "اۋرۋىن جاسىرعان ولەدى" دەگەندەي، ءبىز ەشتەڭەنى جاسىرماۋىمىز كەرەك. پروبلەمالى ماسەلەلەر بولسا، ولاردى تانىپ، ءبىلىپ، ولارعا جاۋاپ بەرۋىمىز كەرەك، – دەيدى مينيستر.

ول ءوز سوزىندە وقۋلىقتارعا ورتاق تالاپ ەنگىزىلگەنىن اتاپ ءوتتى.

– وقۋلىقتاردىڭ فورماتىنا، جىبەرىلگەن قاتەلەرگە بايلانىستى دا سۇراقتار تۋىندايدى. ءبىز ونىڭ ءبارىن بىلەمىز. وقۋلىققا دەگەن ورتاق تالاپ ەنگىزىلدى. مىسالى، كەي فورماتتىڭ بىرەۋى ۇلكەن، بىرەۋى كىشكەنتاي. ءتىپتى مۇعالىمدەردىڭ ايتۋىنشا، 1-سىنىپتارعا ارنالعان ۇستەلدىڭ وزىندە ۇلكەن-ۇلكەن وقۋلىقتاردى 2 بالا ەكى جاقتان جۇمىس داپتەرىن جانە وقۋلىقتى اشقاندا، ۇستەلدىڭ وزىنە سىيماي جاتادى. كەيبىرى "فورمات دەگەن نەگە كەرەك؟" دەپ ويلاۋى مۇمكىن. ءبىراق وقۋلىقتىڭ فورماتى، ءقارپى، بەزەندىرۋ ماسەلەسى دە وتە ماڭىزدى. سوندىقتان بالانىڭ جاس ەرەكشەلىگىنە ساي، پسيحولوگيالىق تۇرعىدان بارلىق ماسەلەنى قاراپ، ورتاق تالاپ ەنگىزىلۋدە. بۇل وتە ماڭىزدى، – دەدى ايماعامبەتوۆ.